Shama Mohamed: ‘ഹാറ്റ്സ് ഓഫ് ടു ക്യാപ്റ്റന്‍’, കിരീടനേട്ടത്തിനു പിന്നാലെ രോഹിത് ശര്‍മയെ അഭിനന്ദിച്ച് ഷമ മുഹമ്മദ്
Shama Mohamed: ഐസിസി ചാമ്പ്യൻസ് ട്രോഫിയിലെ കിരീട നേട്ടത്തിന് പിന്നാലെ ഇന്ത്യൻ ക്രിക്കറ്റ് ടീം ക്യാപ്റ്റൻ രോഹിത് ശർമയ്ക്ക് അഭിനന്ദനവുമായി ഷമ മുഹമ്മദ്. നേരത്തെ രോഹിതിന്റെ വണ്ണത്തെ വിമർശിച്ച് കൊണ്ടുള്ള ഷമയുടെ പരാമർശം ഏറെ വിവാദമായിരുന്നു. രോഹിത് കായിക താരത്തിന് ചേരാത്ത തരത്തില്‍ തടിയനാണെന്നും ഇന്ത്യ കണ്ട മോശം ക്യാപ്റ്റന്മാരില്‍ ഒരാളാണെന്നുമായിരുന്നു ഷമയുടെ പ്രസ്താവന.
Shama Mohamed
10 Mar 2025 09:01 AM
ചാമ്പ്യന്‍സ് ട്രോഫി സ്വന്തമാക്കിയതിന് പിന്നാലെ ഇന്ത്യന്‍ ടീമിനെയും ക്യാപ്റ്റന്‍ രോഹിത് ശര്‍മയെയും അഭിനന്ദിച്ച് കോണ്‍ഗ്രസ് നേതാവ് ഷമ മുഹമ്മദ് രംഗത്ത്. സമൂഹമാധ്യമമായ എക്‌സിലൂടെയായിരുന്നു പ്രതികരണം. ഇന്ത്യൻ ടീമിനെ അഭിനന്ദിച്ച് കൊണ്ടുള്ള കുറിപ്പിലാണ് 76 റണ്‍സ് നേടിയ രോഹിത് ശർമ്മയ്ക്ക് പ്രത്യേകമായ അനുമോദനം പങ്കുവെച്ചത്. ശ്രേയസ് അയ്യർ, കെ.എൽ രാഹുൽ എന്നിവരെയും പരാമർശിച്ചാണ് ഷമയുടെ പോസ്റ്റ്.
അതിഗംഭീര പ്രകടനത്തിലൂടെ ചാമ്പ്യൻസ് ട്രോഫി നേടിയ ഇന്ത്യൻ ടീമിന് അഭിനന്ദനങ്ങൾ. 76 റണ്‍സ് നേടി ടീമിനെ മുന്നില്‍ നിന്ന് നയിച്ച ക്യാപ്റ്റന്‍ രോഹിത് ശര്‍മയേയും അഭിനന്ദിക്കുന്നു. ശ്രേയസ് അയ്യർ, കെ.എല്‍ രാഹുൽ എന്നിവരും ഇന്ത്യയുടെ വിജയത്തില്‍ നിര്‍ണായക പങ്ക് വഹിച്ചു. – ഷമ കുറിച്ചു.
Congratulations to #TeamIndia for their stupendous performance in winning the #ChampionsTrophy2025!
Hats off to Captain @ImRo45 who led from the front with a brilliant 76, setting the tone for victory. @ShreyasIyer15 and @klrahul played crucial knocks, steering India to…
— Dr. Shama Mohamed (@drshamamohd) March 9, 2025
രോഹിതിനെ വിമർശിച്ച് കൊണ്ടുള്ള വിവാദ പ്രസ്താവനയ്ക്ക് പിന്നാലെയാണ് അഭിനന്ദനവുമായി ഷമ രംഗത്തെത്തിയത്. ചാമ്പ്യൻസ് ട്രോഫിക്കിടെ ഷമയുടെ വണ്ണത്തെക്കുറിച്ചായിരുന്നു ഷമയുടെ വിവാദ പരാമർശം. ചാമ്പ്യൻസ് ട്രോഫിയിൽ ന്യൂസിലൻഡിനെതിരെയുള്ള മത്സരത്തിൽ 17 പന്തിൽ 15 റൺസിന് രോഹിത് പുറത്തായതിന് പിന്നാലെയായിരുന്നു വിമർശനം. രോഹിത് കായിക താരത്തിന് ചേരാത്ത തരത്തില്‍ തടിയനാണെന്നും ഇന്ത്യ കണ്ട മോശം ക്യാപ്റ്റന്മാരില്‍ ഒരാളാണെന്നുമായിരുന്നു ഷമയുടെ പ്രസ്താവന.
ക്യാപ്റ്റനും താരവുമായി മാറാൻ ഭാഗ്യം ലഭിച്ച ഒരു സാധാരണക്കാരൻ മാത്രമാണ് രോഹിതെന്നും ഷമ പറഞ്ഞു. ഇതിനെതിരെ കായിക ലോകവും എന്നാൽ ഷമയുടെ പ്രസ്താവന വലിയ തോതിൽ വിമർശനത്തിന് കാരണമായി. രാഷ്ട്രീയ എതിരാളികളും കായിക താരങ്ങളും ഉൾപ്പെടെ വിമർശനവുമായി രംഗത്തെത്തി. അതേസമയം കോൺഗ്രസ് ഷമയെ തള്ളിപ്പറഞ്ഞു. കായിക മേഖലയിലെ ഇതിഹാസങ്ങളെ അങ്ങേയറ്റം ബഹുമാനത്തോടും ആദരവോടും കൂടിയാണ് പാർട്ടി കാണുന്നതെന്നും കോൺഗ്രസ് വ്യക്തമാക്കി. ഷമയുടെ അഭിപ്രായം പാർട്ടിയുടേതല്ലെന്ന് കോൺഗ്രസ് പറഞ്ഞു. പിന്നാലെ എക്സിൽ പങ്കുവെച്ച പോസ്റ്റ് ഷമ ഡിലീറ്റ് ചെയ്തു.
ന്യൂസീലൻഡ് മുന്നോട്ടുവച്ച 252 റൺസ് വിജയലക്ഷ്യം 49 ഓവറിൽ 6 വിക്കറ്റ് നഷ്ടത്തിൽ മറികടന്നാണ് ഇന്ത്യയുടെ കിരീട നേട്ടം. 76 റൺസ് നേടിയ രോഹിത് ശര്‍മയാണ് വിജയശില്‍പ്പി. ശ്രേയാസ് അയ്യർ (48), കെഎൽ രാഹുൽ (34 നോട്ടൗട്ട്) എന്നിവരും ഇന്ത്യയുടെ വിജയത്തിൽ നിർണായക പങ്ക് വഹിച്ചു. രാഷ്ട്രപതിയും പ്രധാനമന്ത്രിയും ലോക്‌സഭാ പ്രതിപക്ഷ നേതാവ് രാഹുല്‍ ഗാന്ധിയും ഇന്ത്യന്‍ ടീമിനെ അഭിനന്ദിച്ചു. ഇന്ത്യയുടെ മൂന്നാം ചാമ്പ്യന്‍സ് ട്രോഫി കിരീടമാണിത്.