SA vs IND : തിലകും സഞ്ജുവും തുടങ്ങി; അർഷ്ദീപ് തീർത്തു: നാലാം ടി20യിൽ കൂറ്റൻ ജയത്തോടെ പരമ്പര ഇന്ത്യക്ക്

ദക്ഷിണാഫ്രിക്കക്കെതിരായ മൂന്നാം ടി-20യിൽ ഇന്ത്യക്ക് കൂറ്റൻ ജയം. 135 റൺസിന് വിജയിച്ച ഇന്ത്യ ഇതോടെ 3-1ന് പരമ്പരയും സ്വന്തമാക്കി. ആദ്യം ബാറ്റ് ചെയ്ത ഇന്ത്യ നിശ്ചിത 20 ഓവറിൽ കേവലം ഒരു വിക്കറ്റ് നഷ്ടപ്പെടുത്തി 283 റൺസ് നേടിയപ്പോൾ മറുപടി ബാറ്റിംഗിനിറങ്ങിയ ദക്ഷിണാഫ്രിക്ക 148 റൺസിന് ഓൾ ഔട്ടായി. 120 റൺസ് നേടി പുറത്താവാതെ നിന്ന തിലക് വർമ്മയാണ് കളിയിലെ താരം. രണ്ട് സെഞ്ചുറി ഉൾപ്പെടെ പരമ്പരയിൽ മിന്നും ഫോമിലായിരുന്ന തിലക് തന്നെ പരമ്പരയിലെയും താരം.

ടോസ് നേടി ബാറ്റിംഗിനിറങ്ങിയ ഇന്ത്യക്ക് പടുകൂറ്റൻ സ്കോറാണ് മൂന്ന് ബാറ്റർമാർ ചേർന്ന് സമ്മാനിച്ചത്. തുടരെ രണ്ട് മത്സരങ്ങളിൽ പൂജ്യത്തിന് പുറത്തായ സഞ്ജു അല്പം കരുതലോടെയാണ് ആരംഭിച്ചത്. അഭിഷേകാവട്ടെ, കഴിഞ്ഞ കളിയിൽ നിർത്തിയ ഇടത്തുനിന്ന് തുടങ്ങി. പവർപ്ലേയിൽ സഞ്ജു സാംസൺ – അഭിഷേക് ശർമ്മ സഖ്യം 73 റൺസിൻ്റെ കൂട്ടുകെട്ടുയർത്തി. പവർപ്ലേയിലെ അവസാന പന്തിൽ അഭിഷേക് (18 പന്തിൽ 36) വീണു.

മൂന്നാം നമ്പറിൽ തിലക് വർമ്മ എത്തി. കഴിഞ്ഞ കളി മൂന്നാം നമ്പറിലെത്തി സെഞ്ചുറി നേടിയ തിലക് വർമ്മയും സഞ്ജു സാംസണും ചേർന്ന് പിന്നെ ഒരു ബാറ്റിംഗ് വിരുന്നാണ് കാഴ്ചവച്ചത്. ഏഴ് ബൗളർമാർ മാറി മാറി എറിഞ്ഞിട്ടും ഈ സഖ്യത്തെ വീഴ്ത്താനായില്ല. തിലക് വർമ്മയാണ് സഞ്ജുവിനെക്കാൾ ആക്രമിച്ചുകളിച്ചത്. തിലകിനെ പലതവണയും സഞ്ജുവിനെ ഒരു തവണയും നിലത്തിട്ട ദക്ഷിണാഫ്രിക്കൻ ഫീൽഡർമാർ ഇന്ത്യൻ സഖ്യത്തെ കയ്യയച്ച് സഹായിക്കുകയും ചെയ്തു. ഒടുവിൽ ആദ്യം സഞ്ജുവും പിന്നാലെ തിലകും സെഞ്ചുറി തികച്ചു. സഞ്ജു 51 പന്തിലും തിലക് 41 പന്തിലുമാണ് സെഞ്ചുറിയിലെത്തിയത്. 47 പന്തിൽ 120 റൺസ് നേടി തിലകും 56 പന്തിൽ 109 റൺസ് നേടി സഞ്ജുവും നോട്ടൗട്ടാണ്.

Also Read : Sanju Samson: സഞ്ജുവിന്റെ സിക്‌സ് പതിച്ചത് യുവതിയുടെ മുഖത്ത്; വീഡിയോ

അപരാജിതമായ 210 റൺസിൻ്റെ കൂട്ടുകെട്ടാണ് ഇരുവരും ചേർന്ന് പടുത്തുയർത്തിയത്. ഇത് ടി20യിൽ ഇന്ത്യക്കായി ഏറ്റവും ഉയർന്ന കൂട്ടുകെട്ടാണ് ദക്ഷിണാഫ്രിക്കക്കെതിരായ ഏറ്റവും ഉയർന്ന കൂട്ടുകെട്ട്, ഏറ്റവും ഉയർന്ന രണ്ടാം വിക്കറ്റ് കൂട്ടുകെട്ട് എന്നീ റെക്കോർഡുകളും ഇതിന് തന്നെ. ഇന്ത്യ ആകെ 23 സിക്സറുകളാണ് അടിച്ചത്. ഇത് ടി20യിലെ റെക്കോർഡാണ്.

മറുപടി ബാറ്റിംഗിൽ തുടരെ വിക്കറ്റുകൾ നഷ്ടമായ ദക്ഷിണാഫ്രിക്കയ്ക്ക് പൊരുതാൻ പോലും കഴിഞ്ഞില്ല. ഏഴ് താരങ്ങളാണ് ഒറ്റയക്കത്തിന് പുറത്തായത്. 29 പന്തിൽ 43 റൺസ് നേടിയ ട്രിസ്റ്റൻ സ്റ്റബ്സ് ആണ് പ്രോട്ടീസിൻ്റെ ടോപ്പ് സ്കോറർ. ഡേവിഡ് മില്ലർ (27 പന്തിൽ 36), മാർക്കോ യാൻസൻ (12 പന്തിൽ പുറത്താവാതെ 29) എന്നിവരും തിളങ്ങി. ഇന്ത്യക്കായി അർഷ്ദീപ് സിംഗ് മൂന്ന് വിക്കറ്റ് വീഴ്ത്തി. അക്സർ പട്ടേലിനും വരുൺ ചക്രവർത്തിയ്ക്കും രണ്ട് വിക്കറ്റ് വീതമുണ്ട്.