Sabarimala Makaravilakku: ശബരിമല മകരവിളക്ക്; സ്‌പോട്ട് ബുക്കിങ്ങിൻ്റെ എണ്ണം വെട്ടിക്കുറച്ചു, വെർച്വൽ ക്യൂവിനും നിയന്ത്രണം

പത്തനംതിട്ട: ശബരിമലയിൽ മകരവിളക്ക് മഹോത്സവത്തോട് അനുബന്ധിച്ചുള്ള സുരക്ഷാ മുന്നൊരുക്കങ്ങളുടെ ഭാ​ഗമായി സ്‌പോട്ട് ബുക്കിങ്ങിലും വെർച്വൽ ക്യൂവിലും നിയന്ത്രണം. ജനുവരി എട്ട് മുതൽ 15 വരെ ശബരിമലയിലെ സ്‌പോട്ട ബുക്കിങ്ങുകളുടെ എണ്ണം ദിനംപ്രതി 5000 ആയി നിജപ്പെടുത്തിയതായി അധികൃതർ അറിയിച്ചു. തിരക്ക് നിയന്ത്രിക്കുന്നതിൻ്റെ ഭാ​ഗമായി ഹൈക്കോടതിയുടെ ഉത്തരവിന്റെ അടിസ്ഥാനത്തിലാണ് നടപടി. ജനുവരി 12ന് 60,000, 13ന് 50,000, 14ന് 40,000 പേർ എന്ന രീതിയിൽ വെർച്വൽ ക്യൂവിനും ദേവസ്വം ബോർഡ് നിയന്ത്രണം ഏർപ്പെടുത്തിയിരിക്കുന്നത്. ജനുവരി 14നാണ് മകരവിളക്ക് മഹോത്സവം.

ദർശനത്തിനു ശേഷം ഭക്തരെ സന്നിധാനത്ത് തങ്ങാൻ അനുവദിക്കുകയില്ലെന്നും നിർദ്ദേശത്തിൽ പറയുന്നു. ശബരിമലയിൽ മകരവിളക്കിനോട് അനുബന്ധിച്ച് തിരക്ക് കൂടാനുള്ള സാധ്യത കണക്കിലെടുത്താണ് ഇത്തരമൊരു നടപടി സ്വീകരിച്ചിരിക്കുന്നത്. കൂടാതെ നിലയ്ക്കലിൽ പരിശോധന നടത്തിയശേഷമാകും ഭക്തരെ പമ്പയിലേക്ക് കടത്തിവിടുക. ഭക്തർക്ക് സുരക്ഷിതമായ ജ്യോതിദർശനം നടത്തുന്നതിനായി വിവിധ ഇടങ്ങിളിൽ ഭക്തർക്ക് വേണ്ട എല്ലാവിധ സൗകര്യങ്ങളും ഏർപ്പടുത്തിയിട്ടുണ്ട്.

ഇത്തവണത്തെ മകരവിളക്ക് ദർശനത്തിന് 3 ലക്ഷം തീർത്ഥാടകർ ജനുവരി 14 ന് ശബരിമല സന്നിധാനത്ത് എത്തിച്ചേരുമെന്നാണ് പ്രതീക്ഷിക്കുന്നത്. ജനുവരി 12ന് ഉച്ചയ്ക്ക് ഒരുമണിക്കാണ് പന്തളത്തുനിന്ന് തിരുവാഭരണ ഘോഷയാത്ര പുറപ്പെടുന്നത്. പന്തളം വലിയ കോയിക്കൽ ക്ഷേത്രത്തിൽ നിന്നു പുറപ്പെടുന്ന ഘോഷയാത്ര വിവിധ ക്ഷേത്രങ്ങൾ സന്ദർശിച്ച ശേഷമാകും സന്നിധാനത്തെത്തുക. പുതിയകാവ് ക്ഷേത്രം, ളാഹ എന്നിവിടങ്ങളിലെ താവളങ്ങളും താണ്ടി ജനുവരി 14നു ശബരിമലയിൽ എത്തിച്ചേരും.

തിരുവാഭരണ ഘോഷയാത്രയോട് അനുബന്ധിച്ച് വിപുലമായ സുരക്ഷാക്രമീകരണങ്ങളാണ് ഒരുക്കിയിരിക്കുന്നത്. ഇതുവരെയുള്ള കണക്കുകൾ പ്രകാരം 39,02,610 ഭക്തരാണ് ഇത്തവണത്തെ മണ്ഡലക്കാലത്ത് ശബരിമലയിൽ എത്തിച്ചേർന്നിട്ടുള്ളത്. കഴിഞ്ഞവർഷം ഇതേകാലയളവിൽ ശബരിമലയിൽ എത്തിയത് 35,12,691 പേരാണ്. മകരവിളക്കിന് മ​ഹോത്സവത്തിന് മുന്നോടിയായി, സന്നിധാനത്ത് വാട്ടർ അതോറിറ്റി പൂർണ്ണശേഷിയിൽ ജലശുദ്ധീകരണം ആരംഭിച്ചിട്ടുണ്ട്. സാധാരണ ദിവസങ്ങളിൽ 18 മണിക്കൂർ ജലശുദ്ധീകരണമാണ് നടക്കുന്നത്. തിരക്ക് കൂടുന്നത് പരിഗണിച്ച് 13 ദശലക്ഷം ലിറ്ററിൻറെ ജലശുദ്ധീകരണശേഷി പൂർണ്ണമായി വിനിയോഗിക്കാനാണ് ഇത്തരമൊരു തീരുമാനം കൈകൊണ്ടത്.

അതേസമയം കഴിഞ്ഞ വർഷത്തേക്കാൾ 82 കോടിയുടെ അധിക വരുമാനമാണ് ഇത്തവണത്തെ മണ്ഡലകാലത്ത് ദേവസ്വം ബോർഡിനുണ്ടായതെന്നാണ് കണക്ക്. കാണിക്ക ഇനത്തിലും, അരവണ വിൽപനയിലും വരുമാനം വർദ്ധിച്ചിട്ടുണ്ട്. നവംബർ 15 മുതൽ ഡിസംബർ 26 വരെ നീണ്ട 41 ദിവസത്തെ മണ്ഡല കാലത്ത് 297 കോടി രൂപയുടെ വരുമാനമാണ് ലഭിച്ചിരിക്കുന്നത്. കഴിഞ്ഞ വർഷം ഇതേ കാലയളവിലെ കണക്ക് അനുസരിച്ച്, 215 കോടിയോളമായിരുന്നു വരുമാനം. അരവണ വിൽപനയിലൂടെയാണ് അധിക വരുമാനമായ 82 കോടിയിൽ കൂടുതലും ലഭിച്ചിരിക്കുന്നത്. കഴിഞ്ഞ മണ്ഡലക്കാലത്തെക്കാൾ 22 കോടിയുടെ അരവണയാണ് ഇത്തവണ അധികമായി വിറ്റുപോയത്. കാണിക്കയായി മാത്രം ലഭിച്ചത് 80 കോടിയിലേറെ രൂപയാണ്. പതിമൂന്ന് കോടിയുടെ വർധനവാണ് ഈ ഇനത്തിൽ ​ദേവസ്വം ബോർഡിനുണ്ടായിരിക്കുന്നത്.