Dev Deepavali 2024: വാരണാസിയെ വർണ്ണാഭമാക്കുന്ന ദേവ് ദീപാവലി…; അറിയാം പ്രത്യേകതകളും ആചാരങ്ങളും

ദേവ് ദീപാവലി അഥവാ ത്രിപുരോത്സവ്, വിശുദ്ധ നഗരമായ വാരണാസിയിൽ വർഷം തോറും ആഘോഷിക്കപ്പെടുന്ന ഉത്സവമാണിത്. 2024-ൽ, ഇത് നവംബർ 15 വെള്ളിയാഴ്ച ആചരിക്കും. ഹിന്ദു പുരാണങ്ങളെ അടിസ്ഥാനമാക്കി, ത്രിപുരാസുരൻ എന്ന രാക്ഷസൻ്റെ മേൽ ശിവൻ വിജയിച്ചതിൻ്റെ സ്മരണാർത്ഥമാണ് ഈ ഉത്സവം ആഘോഷിക്കപ്പെടുന്നത്. ഇന്ത്യയിലെ ഉത്തർപ്രദേശിലെ വാരണാസിയിൽ ആഘോഷിക്കുന്ന കാർത്തിക പൂർണിമയുടെ ഉത്സവമാണ് ദേവ് ദീപാവലി. ദീപാവലി കഴിഞ്ഞ് പതിനഞ്ചാമത്തെ ദിവസമാണ് ഇത് ആഘോഷിക്കുന്നത്.

അന്നേ ദിവസം ഗംഗാനദിയുടെ തീരത്തിനോട് ചേർന്നുള്ള ഇരുവശങ്ങളിലും ഒരു ദശലക്ഷത്തിലധികം മൺവിളക്കുകൾ കത്തിക്കുന്നു. ഈ വർണ്ണാഭമായ കാഴ്ചക്കാണാൻ ലോകത്ത് പല സ്ഥലങ്ങളിൽ നിന്നും അവിടേക്ക് അളുകൾ എത്തിചേരും. ഗംഗയിൽ കുളിക്കാനായി ഈ ദിവസം ദേവന്മാർ ഭൂമിയിലേക്ക് ഇറങ്ങിവരുമെന്നാണ് പുരാണങ്ങളിൽ പറയുന്നത്. വാരണാസിയിലെ തെരുവുകൾ ഇന്ന് ദീപങ്ങളാൽ അലങ്കരിക്കപ്പെടും.

പ്രാധാന്യമെന്ത്?

ഘോരമായ യുദ്ധത്തിനൊടുവിൽ പരാജയപ്പെട്ട ത്രിപുരാസുരൻ എന്ന രാക്ഷസൻ്റെ മേൽ പരമശിവൻ നേടിയ വിജയമാണ് ദേവ് ദീപാവലിയായി ആഘോഷിക്കുന്നത്. ഈ ദിവസം ത്രിപുരാരി പൂർണിമ എന്നും അറിയപ്പെടുന്നു. ദേവ് ദീപാവലി ദേവന്മാർ ഭൂമിയിലേക്ക് ഇറങ്ങുന്ന സമയമാണെന്ന് വിശ്വസിക്കപ്പെടുന്നു. ആത്മീയ ആചാരങ്ങളിലൂടെ അനുഗ്രഹം നേടാനും മനസ്സും ശരീരവും ഒരുപോലെ ശുദ്ധീകരിക്കാനുമുള്ള അവസരമായാണ് ഭക്തർ ഇതിനെ കാണുന്നത്.

ആചാരങ്ങൾ

ദേവ് ദീപാവലിയുടെ പ്രധാന ചടങ്ങുകൾ പുലർച്ചെ ആരംഭിക്കുന്നു. ഈ ചടങ്ങുകൾ രാത്രി വരെ തുടരുകയും ചെയ്യും. ഹിന്ദുമതത്തിലെ ഏറ്റവും പവിത്രമായ നദികളിലൊന്നായ ഗംഗയിൽ പുണ്യസ്നാനം നടത്തിയാണ് ഭക്തർ സാധാരണയായി ഈ ദിവസം ആരംഭിക്കുന്നത്. നദിയിൽ കുളിക്കുന്നത് ശരീരത്തെയും ആത്മാവിനെയും ശുദ്ധീകരിക്കുമെന്നും അതിലൂടെ ഭക്തർക്ക് ആത്മീയ വിശുദ്ധി കൈവരിക്കാൻ സാധിക്കുമെന്നും വിശ്വസിക്കപ്പെടുന്നു.

വൈകുന്നേരം സൂര്യനസ്തമിച്ച ശേഷം, വലിയ ആഘോഷങ്ങൾ ആരംഭിക്കുന്നു. ദേവ് ദീപാവലിയുടെ ഏറ്റവും പ്രധാനപ്പെട്ട ആചാരങ്ങളിലൊന്നാണ് മൺവിളക്കുകൾ കത്തിക്കുന്നത്. ഈ ആയിരക്കണക്കിന് വിളക്കുകൾ വാരണാസിയിലുടനീളമുള്ള ഗംഗയുടെ ഘട്ടങ്ങളെയും ക്ഷേത്രങ്ങളെയും വർണ്ണാഭമാക്കുന്നു.

മന്ത്രങ്ങൾ ജപിക്കുക, ഭജനകൾ (ഭക്തിഗാനങ്ങൾ) ആലപിക്കുക, ശിവനെ ബഹുമാനിക്കുന്നതിനായി ആരതി നടത്തുക എന്നിവയാണ് ഈ ദിവസം വാരണാസിയിൽ അരങ്ങേറുന്നത്. എല്ലാ ഘാട്ടുകളും വിളക്കുകൾ കത്തിക്കുകയും ആരതി നടത്തുകയും ചെയ്യുമ്പോൾ, വൈകുന്നേരങ്ങളിൽ നദീതീരത്തുകൂടിയുള്ള ബോട്ട് സവാരി വിനോദസഞ്ചാരികൾക്കിടയിൽ ജനപ്രിയമാണ്.