Onam 2024: ‘ഓണം വന്നല്ലോ ഊഞ്ഞാലിട്ടാലോ….’അങ്ങനെ പാട്ടും പാടി തിരുവോണം ഇങ്ങെത്തി

Updated On:

14 Sep 2024 22:52 PM

Specialties and Importance of Thiruvonam Day, Onam 2024: അത്തം നാളിൽ തുടങ്ങിയ ഓണാഘോഷം പത്താം നാളായ തിരുവോണത്തിൽ എത്തി നിൽക്കുകയാണ്. വീടും പരിസരവും വൃത്തിയാക്കലും ഓണക്കോടി എടുക്കലുമെല്ലാം പൂർത്തിയായി. ഇനി ബാക്കിയുള്ളത് ആഘോഷമാണ്.

തിരുവോണത്തെ വരവേൽക്കാൻ മലയാളികൾ ഒരുങ്ങിക്കഴിഞ്ഞു. കാണം വിറ്റും ഓണം ഉണ്ണണമെന്ന് പഴമക്കാർ പറഞ്ഞതുപോലെ പ്രതിസന്ധികളും ഇല്ലായ്മകളും മറന്നാണ് മലയാളികൾ ഓണം ആഘോഷിക്കുന്നത്. വലിയവനും ചെറിയവനുമെന്നോ ഉള്ളവനും ഇല്ലാത്തവനുമെന്നോ മുതലാളിയും തൊഴിലാളിയുമെന്നോ ഇല്ലാതെ എല്ലാവരും ഒന്നായിരുന്ന ഒരു കാലത്തിന്റെ ഓർമപ്പെടുത്തലാണ് തിരുവോണം. മലയാളികളുടെ ഒരു തിരുവോണ ദിവസം എങ്ങനെയെന്ന് നോക്കാം.

2 / 6

തിരുവോണ ദിവസം രാവിലെ എഴുന്നേറ്റ് വീട്ടിലെ എല്ലാ അംഗങ്ങളും കുളിച്ച് ശുദ്ധിയായി ദിവസം തുടങ്ങും. ഉച്ചയ്ക്കുള്ള സദ്യ തയ്യാറാക്കുന്നതിന് മുൻപായി രാവിലെ പുട്ടും പഴം പുഴുങ്ങിയതും കഴിച്ചുകൊണ്ട് ദിവസം ആരംഭിക്കും. പൂക്കളത്തിനായുള്ള പൂ നുള്ളലും ഡിസൈൻ തീരുമാനിക്കലുമൊക്കെയായി വീട്ടിലെ കുസൃതി കൂട്ടങ്ങൾ തിരക്കിലായിരിക്കും. വീട്ടിലെ മുതിർന്ന അംഗങ്ങളാണെങ്കിൽ സദ്യ ഉണ്ടാക്കുന്ന തിരക്കിലുമായിരിക്കും.

3 / 6

തിരുവോണ ദിനത്തിൽ പുത്തൻ വസ്ത്രം ധരിച്ച് ഒരുങ്ങന്നതാണ് രീതി. എന്നാൽ, പുത്തൻ വസ്ത്രം ധരിച്ചില്ലെങ്കിലും നല്ലപോലെ അലക്കി ഉണക്കിയ വസ്ത്രമെങ്കിലും ധരിക്കാൻ ശ്രദ്ധിക്കണം. അടുത്ത പടി പൂക്കളമിടലാണ്. ഓണത്തിന്റെ വരവറിയിച്ച് അത്തം നാളിൽ തുടങ്ങുന്ന പൂക്കളമിടലിന്റെ അവസാന ദിനമാണ് തിരുവോണം.

4 / 6

അത്തം മുതൽ തീർത്ത പൂക്കളങ്ങളെക്കാൾ വലിയ പൂക്കളമിട്ടാണ് മലയാളികൾ മഹാബലിക്കായി കാത്തിരിക്കാറുള്ളത്. തിരുവോണ നാളിൽ പൂക്കളം തയ്യാറാക്കുന്ന രീതിയിൽ വ്യത്യാസമുണ്ട്. ഈ ദിവസം ഓണത്തപ്പന്റെ സങ്കൽപരൂപത്തിന് (തൃക്കാരപ്പൻ) മാവൊഴിച്ച് തൂമ്പപ്പൂ നിരത്തി പൂവട നേദിക്കും. തൂശനിലയിൽ ദർഭപ്പുല്ല് വിരിച്ച് തൃക്കാക്കരയപ്പനെ ആർപ്പുവിളിച്ചും സ്വീകരിക്കും.

5 / 6

പൂക്കളമിടൽ കഴിഞ്ഞാൽ പ്രധാനം ഓണസദ്യയാണ്. കുടുംബത്തിലെ എല്ലാ അംഗങ്ങളും ഒന്നിച്ചിരുന്ന് വലിയ ആഘോഷമായാണ് സദ്യ ഉണ്ടാക്കുന്നതും കഴിക്കുന്നതും. ഓണത്തിന് ഒരുപാട് കറികളുള്ള സമൃദ്ധമായ സദ്യ വേണമെന്ന് നിർബന്ധമില്ല. വീട്ടിലുള്ള സാധനങ്ങൾ കൊണ്ട് നമ്മളാൽ കഴിയാവുന്ന കറികൾ ഉണ്ടാക്കി കുടുംബത്തോടൊത്ത് സന്തോഷത്തോടെ കഴിക്കുകയെന്നതാണ് പ്രധാനം.

6 / 6

സദ്യയുണ്ട് കഴിഞ്ഞാൽ പണ്ടത്തെ ഒരു രീതിയനുസരിച്ച് അടുത്തത് ഓണക്കളികളാണ്. ഇന്നത്തെ തലമുറയ്ക്ക് ഓണക്കളികൾ അത്ര പരിചിതമല്ല. എന്നാൽ പണ്ട് കാലങ്ങളിൽ കുടുംബാംഗങ്ങൾ ഒത്തുചേർന്ന് ഇത്തരം വിനോദങ്ങൾ ഒരുക്കാറുണ്ട്. വടംവലി, ഉറിയടി പോലുള്ളവയാണ് ഇതിൽ പ്രധാനം. ഇത്തരം ആഘോഷങ്ങൾ ഇല്ലാതായി വരുന്നെന്ന് പറയുന്നുണ്ടെങ്കിലും ഓണാഘോഷത്തിന്റെ ഭാഗമായി സ്കൂളുകളിലും കോളേജികളിലും മറ്റും ഇപ്പോഴും ഇത്തരം പരിപാടികൾ ഒരുക്കാറുണ്ട്. ഇതുപോലുള്ള ആചാരങ്ങൾ ഓർമ്മകളിൽ മാത്രമാകാതിരിക്കാൻ നമുക്കും പരിശ്രമിക്കാം.

ഓണം

Choose your language

Onam 2024: ‘ഓണം വന്നല്ലോ ഊഞ്ഞാലിട്ടാലോ….’അങ്ങനെ പാട്ടും പാടി തിരുവോണം ഇങ്ങെത്തി

Network