Smoothie: ബ്രേക്ക് ഫാസ്റ്റിന് ഒരു ഇം​ഗ്ലീഷ് ടച്ച് ആയാലോ? എളുപ്പത്തിൽ തയ്യാറാക്കാൻ കഴിയുന്ന സ്മൂത്തികൾ ഇതാ

Credits: Image Professionals GmbH

രാവിലെ ഭക്ഷണത്തിന് എന്തുണ്ടാകും എന്നതിനെ കുറിച്ച് തലേ​ദിവസമേ തലപുകയ്ക്കുന്നവരാണ് നമ്മളിൽ. പുട്ടും അപ്പവും ദോശയും ഇഡ്ലിയുമെല്ലാം കഴിച്ച് മടുത്തോ? രുചിയല്ല പലരെയും പിന്നോട്ട് വലിക്കുന്നത്, ഇതെല്ലാം ഉണ്ടാക്കിയെടുക്കുവാനുള്ള സമയമാണ് മിക്കവരുടെയും പ്രശ്നം. അധികം സമയം കളയാതെ എന്തുണ്ടാകാം എന്നാണ് പലരും ചിന്തിക്കുന്നത്. ഇം​ഗ്ലീഷ് സ്റ്റെെലിൽ സ്മൂത്തി ആയാലോ?

ബ്രേക്ക്ഫസ്റ്റ് സ്മൂത്തി റെസിപ്പികൾ

1. ഓട്സ്- ചിയാ സീഡ് സ്മൂത്തി
‌‌
ഓട്സ്– 4 ടേബിൾ സ്പൂൺ
പാൽ– 1 ഗ്ലാസ്
കശുവണ്ടി–6എണ്ണം
ഈന്തപ്പഴം– 3 എണ്ണം
റോബസ്റ്റ പഴം – 1
ചിയാ സീഡ്– ഒരു സ്പൂൺ

3 ടീസ്പൂൺ ഓട്സ് തലേദിവസം തന്നെ ആവശ്യത്തിന് വെള്ളം ചേർത്ത് കുതിരാൻ വയ്ക്കുക. ഇതിലേക്ക് 6 കശുവണ്ടിയും ചേർക്കുക. രാവിലെ കുതിർത്ത് വച്ചിരിക്കുന്ന ഓട്സും കശുവണ്ടിയും കരു നീക്കിയ 3 ഈന്തപ്പഴവും റോബസ്റ്റ പഴവും ഒരു സ്പൂൺ ചിയാ സീഡും ഒരു കപ്പ് പാലും മിക്സിൽ അടിച്ചെടുക്കാവുന്നതാണ്. വെയ്റ്റ് കുറയ്ക്കാനായി ഡയറ്റ് ചെയ്യുന്നവർക്കും ബ്രേക്ക് ഫാസ്റ്റ് ഉണ്ടാക്കാൻ സമയമില്ലാത്താവർക്കും എളുപ്പത്തിൽ ഈ സ്മൂത്തി തയ്യാറാക്കാവുന്നതാണ്.

2. പീനട്ട് ബട്ടർ ബനാന സ്മൂത്തി

എത്തപ്പഴം- 1
പാൽ- 1.5 കപ്പ്
പീനട്ട് ബട്ടർ- അര കപ്പ്
തേൻ-2 ടേബിൾ സ്പൂൺ

ഏത്ത‌പ്പഴം ചെറിയ കഷ്ണങ്ങളായി അരിഞ്ഞെടുക്കുക. ഇതിലേക്ക് പാൽ, പീനട്ട് ബട്ടർ, തേൻ എന്നിവ ചേർത്ത് അടിച്ചെടുക്കാം. ആവശ്യമെങ്കിൽ കശുവണ്ടി, ബ​ദാം ഉൾപ്പെടെയുള്ളവും ഇതിലേക്ക് ചേർക്കാം.

3. റാ​ഗി സ്മൂത്തി

റാഗി- 2 സ്പൂൺ
ഉപ്പ്- ആവശ്യത്തിന്
കാരറ്റ്- 1 വലുത്
അണ്ടിപരിപ്പ്- 3 ടേബിൾ സ്പൂൺ
പാൽ- 2 കപ്പ്
പഞ്ചസാര – ആവശ്യത്തിന്

ഒരു പാത്രത്തിൽ ഒന്നര കപ്പ് കപ്പ് വെള്ളം ചൂടാക്കുക. ഇതിലേക്ക് കാൽ കപ്പ് വെള്ളത്തിൽ കലക്കി വച്ചിരിക്കുന്ന റാ​ഗി ചേർക്കുക. ചെറു തീയിൽ കുറുക്കിയെടുക്കുക. തിള വരുമ്പോൾ ഒരു നുള്ള് ഉപ്പ് ചേർക്കുക. റാ​ഗി നന്നായി കുറുകി വരുമ്പോൾ തീ ഓഫ് ചെയ്ത് ചൂടാറാൻ വയ്ക്കുക. കാരറ്റ് ചെറിയ കഷ്ണങ്ങളാക്കി വേവിച്ചെടുക്കുക. റാ​ഗി മിശ്രിതം, വേവിച്ച കാരറ്റ്, അണ്ടിപരിപ്പ്, കാൽ കപ്പ് പാൽ, ആവശ്യത്തിന് പഞ്ചസാര എന്നിവ ചേർത്ത് മിക്സിയിൽ അടിച്ചെടുക്കുക. ഇതിലേക്ക് ബാക്കിയുള്ള പാൽ കൂടി ചേർത്ത് അടിച്ചെടുക്കാം.

4. സ്ട്രോ​ബെ​റി- ബനാന സ്മൂത്തി

സ്ട്രോ​ബെ​റി : 10 എ​ണ്ണം
റോബസ്റ്റ പഴം: 2 എ​ണ്ണം
പാ​ൽ: ഒന്നേ കാൽ കപ്പ്
ഈന്തപ്പഴം: മൂന്ന് എണ്ണം

സ്ട്രോ​ബെ​റി, റോബസ്റ്റ പ​ഴം, പാ​ൽ, ഈന്തപ്പഴം എന്നിവ മി​ക്സി​യി​ൽ ന​ന്നാ​യി അ​ടി​ച്ചെ​ടു​ക്കു​ക. പാലിന് പകരം സോയാ മിൽക്ക് ബദാം മിൽക്ക് എന്നിവ ഉപയോ​ഗിക്കാവുന്നതാണ്.

5.കാരറ്റ് സ്മൂത്തി

കാരറ്റ്: രണ്ട് എണ്ണം
മാമ്പഴം: 1
കുക്കുംബർ: 1
കട്ടത്തൈര്: കാൽകപ്പ്
ബദാം മിൽക്ക്: അരകപ്പ്

ഒരു മിക്സിയുടെ ജാറിലേക്ക് ചേരുവകളെല്ലാം ചേർത്ത് നന്നായി അടിച്ചെടുക്കുക. മധുരം ആവശ്യമെങ്കിൽ തേൻ, പഞ്ചസാര, ഈന്തപ്പഴം എന്നിവ ചേർക്കാം.

‌