Vellapally Natesan: പിണറായി മൂന്നാം തവണയും അധികാരത്തിലെത്തും; ആശംസയറിയിച്ച് വെള്ളാപ്പള്ളി
Vellapally Natesan Says Pinarayi Will Return To Power Again: എസ്എന്‍ഡിപി യോഗത്തോട് പിണറായി സ്വീകരിക്കുന്നത് കരുണാപൂര്‍വമായ നിലപാടാണ്. സര്‍ക്കാരുമായി നടക്കുന്ന ഇടപാടുകളില്‍ പല കുറവുകളും സംഭവിച്ചിട്ടുണ്ട്. അതെല്ലാം സ്വകാര്യമായി സംസാരിച്ച് പരിഹാരം കാണുന്നതിനായാണ് ശ്രമിക്കാറുള്ളത്. പ്രശ്‌നങ്ങള്‍ പഠിക്കാനും പരിഹാരം കാണാനും മുഖ്യമന്ത്രി ശ്രമിക്കാറുണ്ടെന്നും വെള്ളാപ്പള്ളി കൂട്ടിച്ചേര്‍ത്തു.
വെള്ളാപ്പള്ളി നടേശന്‍, പിണറായി വിജയന്
12 Apr 2025 07:14 AM
ആലപ്പുഴ: പിണറായി വിജയന് മൂന്നാം തവണയും മുഖ്യമന്ത്രിയായി തിരഞ്ഞെടുക്കപ്പെടുമെന്ന് എസ്എന്‍ഡിപി യോഗം ജനറല്‍ സെക്രട്ടറി വെള്ളാപ്പള്ളി നടേശന്‍. സംസ്ഥാനത്തെ നിലവിലെ രാഷ്ട്രീയ കാലാവസ്ഥ പിണറായിയുടെ ഭരണ തുടര്‍ച്ചയാണ് വ്യക്തമാക്കുന്നതെന്നും വെള്ളാപ്പള്ളി പറഞ്ഞു. അദ്ദേഹം എസ്എന്‍ഡിപി നേതൃത്വത്തിലെത്തിയതിന്റെ മുപ്പതാം വാര്‍ഷികാഘോഷത്തിലാണ് പരമാര്‍ശം.
എസ്എന്‍ഡിപി യോഗത്തോട് പിണറായി സ്വീകരിക്കുന്നത് കരുണാപൂര്‍വമായ നിലപാടാണ്. സര്‍ക്കാരുമായി നടക്കുന്ന ഇടപാടുകളില്‍ പല കുറവുകളും സംഭവിച്ചിട്ടുണ്ട്. അതെല്ലാം സ്വകാര്യമായി സംസാരിച്ച് പരിഹാരം കാണുന്നതിനായാണ് ശ്രമിക്കാറുള്ളത്. പ്രശ്‌നങ്ങള്‍ പഠിക്കാനും പരിഹാരം കാണാനും മുഖ്യമന്ത്രി ശ്രമിക്കാറുണ്ടെന്നും വെള്ളാപ്പള്ളി കൂട്ടിച്ചേര്‍ത്തു. മൂന്നാം തവണയും അധികാരത്തിലേക്ക് എത്താന്‍ പിണറായി വിജയന് സാധിക്കട്ടെയെന്നും വെള്ളാപ്പള്ളി ആശംസിച്ചു.
അതേസമയം, പരിപാടിയില്‍ മുഖ്യമന്ത്രി പിണറായി വിജയനും പങ്കെടുത്തിരുന്നു. വെള്ളാപ്പള്ളി നടേശനെ പുകഴ്ത്തി അദ്ദേഹം സംസാരിച്ചു. വെള്ളാപ്പള്ളി നടേശന്‍ ഈഴവര്‍ക്ക് ആത്മവിശ്വാസം നല്‍കുന്ന വ്യക്തിയാണെന്ന് മുഖ്യമന്ത്രി പറഞ്ഞു.
വെള്ളാപ്പള്ളി നടേശന്റെ നേതൃപാടവും കര്‍മശേഷിയും അസാധാരണമാണെന്ന് മുഖ്യമന്ത്രി അഭിപ്രായപ്പെട്ടു. മലപ്പുറത്ത് വെള്ളാപ്പള്ളി നടത്തിയ പരാമര്‍ശത്തെയും മുഖ്യമന്ത്രി ന്യായീകരിച്ചു. വെള്ളാപ്പള്ളി പറഞ്ഞത് ഒരു രാഷ്ട്രീയ പാര്‍ട്ടിക്കെതിരെയാണ്. എന്നാല്‍ അതിനെ ചിലര്‍ മതത്തിനെതിരെ വളച്ചൊടിച്ചുവെന്നും അദ്ദേഹം പറഞ്ഞു.
വെള്ളാപ്പള്ളിയെ അറിയാവുന്നവര്‍ക്ക് അദ്ദേഹം ഏതെങ്കിലും മതത്തിന് എതിരായി നിലപാട് സ്വീകരിക്കുന്ന ആളല്ലെന്ന് അറിയാം. എല്ലായ്‌പ്പോഴും വിവിധ മതങ്ങളുമായി യോജിച്ച് ഒട്ടേറെ കാര്യങ്ങള്‍ ഉയര്‍ത്തികൊണ്ടുവരാന്‍ ശ്രമിച്ചിട്ടുള്ളയാളാണ് വെള്ളാപ്പള്ളി. തെറ്റിധാരണ പരത്താനുള്ള അവസരം അദ്ദേഹത്തിന്റെ പ്രസംഗത്തില്‍ വന്നു. ഇത്തരം കാര്യങ്ങളില്‍ കൂടുതല്‍ ശ്രദ്ധയും അവധാനതയും വെള്ളാപ്പള്ളി പുലര്‍ത്തണമെന്നും പിണറായി കൂട്ടിച്ചേര്‍ത്തു.