Vande bharath Kerala: വന്ദേഭാരതിന് നീളം കൂടുമോ? കോച്ചുകള്‍ ഇരട്ടിയാക്കുമെന്ന് സൂചന
Vande Bharath service in Kerala : പുതിയ റാക്കുകൾ എത്തുന്നതോടെ, എട്ടു കോച്ചുകളുള്ള മംഗലാപുരം വന്ദേഭാരതിന്റെ കോച്ചുകളുടെ എണ്ണം 16 ആയി വർധിക്കും എന്നാണ് വിവരം.
Vande Bharat Train (Image Courtesy : Deepak Gupta/HT via Getty Images
തിരുവനന്തപുരം: രാജ്യത്ത് ഉടനീളം സർവ്വീസ് നടത്തുന്ന വന്ദേഭാരത് ട്രെയിനുകളിൽ ലാഭത്തിലുള്ള സർവ്വീസുകളിൽ ഒന്നാണ് കേരളത്തിലേത്. വളർന്നു വരുന്ന യാത്രക്കാരുടെ ആവശ്യവും തിരക്കും പരിഗണിച്ച ഇപ്പോൾ കേരളത്തിന് കൂടുതൽ വന്ദേഭാരത് റാക്കുകൾ ഉടൻ അനുവദിച്ചേക്കും എന്ന സൂചനകൾ പുറത്തു വരുന്നു. ഇതിനുള്ള ക്രമീകരണങ്ങൾ പൂർത്തിയായതായാണ് റെയിൽവേ സൂചിപ്പിച്ചിട്ടുള്ളത്.
വാർത്താ ഏജൻസിയായ ഐഎഎൻഎസ് ആണ് ഈ വിവരം റിപ്പോർട്ട് ചെയ്തത്. നിലവിൽ രണ്ടു വന്ദേഭാരത് ട്രെയിനുകളാണ് കേരളത്തിൽ സർവീസ് നടത്തുന്നത്. ഒരെണ്ണം തിരുവനന്തപുരം-മംഗലാപുരം റൂട്ടിലും മറ്റൊന്ന് തിരുവനന്തപുരം- കാസർകോട് റൂട്ടിലുമാണ് ഉള്ളത്.
പുതിയ റാക്കുകൾ എത്തുന്നതോടെ, എട്ടു കോച്ചുകളുള്ള മംഗലാപുരം വന്ദേഭാരതിന്റെ കോച്ചുകളുടെ എണ്ണം 16 ആയി വർധിക്കും എന്നാണ് വിവരം. നിലവിൽ 16 കോച്ചുകളുള്ള തിരുവനന്തപുരം- കാസർകോട് ട്രെയിനിൽ നാലു കോച്ചുകളാണ് കൂട്ടിച്ചേർക്കുന്നത്. ഇതോടെ ഇതിൽ 20 കോച്ചുകളാകും. നിലവിൽ തിരുവനന്തപുരത്തു നിന്നും മംഗലാപുരം വരെ വന്ദേഭാരത് ട്രെയിൻ 8 മണിക്കൂർ 35 മിനിറ്റാണ് സർവീസ് നടത്താൻ എടുക്കുന്നത്.
സമാന റൂട്ടിൽ ഓടുന്ന ട്രെയിനുകൾ 12 മണിക്കൂർ 50 മിനിറ്റ് എടുക്കുമ്പോഴാണ് വന്ദേഭാരത് ഈ സമയം കൊണ്ട് ഓടി എത്തുന്നത്. വന്ദേ ഭാരത് ട്രെയിനുകൾ വൻ വിജയമായതോടെ മൂന്നാമതൊരു വന്ദേഭാരത് കൂടി സംസ്ഥാനത്തിന് അനുവദിച്ചിട്ടുണ്ട്. ബംഗളുരു- കൊച്ചി റൂട്ടിൽ ആഴ്ചയിൽ മൂന്നു തവണയാണ് പുതിയ വന്ദോരതിൻരെ സർവ്വീസ്.