Rice Smuggling: തമിഴ്‌നാട്ടിൽ നിന്നും ടൺകണക്കിന് സൗജന്യ റേഷനരി കേരളത്തിലേക്ക് കടത്തും; ഇവിടെ അത് ബ്രാൻഡഡ് അരി
Rice Smuggling from Tamil Nadu to Kerala; ഏജന്റിന് നൽകിയാൽ ഒരു കിലോഗ്രാം അരിക്ക് 10 രൂപ വെച്ചാണ് ഇവർക്ക് കിട്ടുന്നത്. അതേസമയം, സംഭരണ കേന്ദ്രങ്ങളിൽ എത്തിക്കുമ്പോൾ ഇവർക്ക് 22 മുതൽ 25 രൂപ വരെ ലഭിക്കുന്നു.
Representational Image (Image Credits: Chadchai Ra-ngubpai/ Getty Images)
കൊല്ലം: തമിഴ്‌നാട്ടിൽ സൗജന്യമായി വിതരണം ചെയ്യുന്ന ടൺകണക്കിന് റേഷനരി കേരളത്തിലേക്ക് കടത്തുന്നു. പൊതു വിതരണ ഉപഭോക്തൃകാര്യ കമ്മീഷണർക്ക് കൃത്യമായ വിവരങ്ങൾ സഹിതം ലഭിച്ച പരാതിയുടെ അടിസ്ഥാനത്തിൽ നടത്തിയ പരിശോധനയിലാണ് ഞെട്ടിക്കുന്ന വിവരങ്ങൾ പുറത്ത് വന്നത്. അന്വേഷണത്തിനായി പ്രത്യേക സംഘത്തെ രൂപീകരിച്ചിരുന്നു. ഏജന്റുമാർ, മില്ലുടമകൾ, അരി മുതലാളിമാർ എന്നിവരടങ്ങുന്ന വലിയൊരു ശ്രിംഖല തന്നെ ഇതിനുപിന്നിൽ പ്രവർത്തിക്കുന്നതായാണ് വിവരം.
കഴിഞ്ഞ ദിവസം ഇതിന് സമാനമായ ഒരു പരാതി ലഭിച്ചതിനെ തുടർന്ന്, അമരവിള ചെക്പോസ്റ്റിൽ നിന്നും തമിഴ്നാട് അധികൃതർ 22.5 ടൺ അരി പിടികൂടിയിരുന്നു. സംഭവത്തിൽ 24 പേരാണ് അറസ്റ്റിലായത്. കേരളത്തിലെ മില്ലുടമയടക്കം അഞ്ചു പേർ ഒളിവിലാണെന്നാണ് ലഭിക്കുന്ന വിവരം.
കാട്ടാക്കട, പെരുമ്പാവൂർ എന്നിവടങ്ങളിലെ മില്ലുകളിലേക്ക് സംഭരണ കേന്ദ്രങ്ങളിൽ നിന്നും എത്തിക്കുന്ന റേഷനരി, തവിടും തവിടെണ്ണയും ചേർത്ത് പോളിഷ് ചെയ്ത ശേഷം വിവിധ ബ്രാൻഡുകളാക്കി മാറ്റി വിൽക്കുന്നു എന്നതാണ് മറ്റൊരു വിവരം. കേരളത്തോട് ചേർന്ന് കിടക്കുന്ന പ്രദേശങ്ങളിൽ, അരികടത്ത് മാഫിയയ്ക്ക് നൂറു കണക്കിന് ഏജന്റുമാരാണുള്ളത്. ഓരോ വീടുകളിൽ നിന്നും എട്ട് മുതൽ 12 രൂപ വരെ നൽകി സൗജന്യ റേഷനരി ശേഖരിക്കുന്നത് ഇവരാണ്.
വീടുകളിൽ നിന്നും ശേഖരിക്കുന്ന അരി, പുലർച്ചെയും അർധരാത്രിയുമായി ചെക്ക്പോസ്റ്റുകൾ വഴി സംഭരണ കേന്ദ്രങ്ങളിൽ എത്തിക്കുന്നു. തുടർന്ന്, ഒരു ചാക്കിൽ 50 കിലോ എന്ന അളവിൽ അവിടെ നിന്നും മില്ലുകളിലേക്ക് കൊണ്ടുപോകുന്നു.
ആര്യങ്കാവിലെ അരി സംഭരണ കേന്ദ്രങ്ങളെ കുറിച്ച് ലഭിച്ച പരാതികൾ അന്വേഷിക്കാനായി രൂപീകരിച്ച പ്രത്യേക അന്വേഷണ സംഘം ഈ പ്രദേശം കഴിഞ്ഞ ഏതാനും നാളുകളായി നിരീക്ഷിച്ചു വരികയായിരുന്നു. വാഹനത്തിൽ അരി എത്തിക്കുന്നതിന് പുറമെ, തീവണ്ടിയിലും ആര്യങ്കാവ് റെയിൽവേ സ്റ്റേഷന് സമീപത്തുള്ള സംഭരണ കേന്ദ്രത്തിൽ അരി എത്തിക്കുന്നതായി ഇവർ കണ്ടെത്തി. ഇത്തരത്തിൽ 25 മുതൽ 30 കിലോ അരി വരെ തീവണ്ടിയിൽ കൊണ്ടുവന്ന് വിൽക്കുന്നത് പുളിയറ, ചെങ്കോട്ട, തെങ്കാശി എന്നിവിടങ്ങളിൽ നിന്നുള്ള വയോധികരാണ്.
ഏജന്റിന് നൽകിയാൽ ഒരു കിലോഗ്രാം അരിക്ക് 10 രൂപ വെച്ചാണ് ഇവർക്ക് കിട്ടുന്നത്. അതേസമയം, സംഭരണ കേന്ദ്രങ്ങളിൽ എത്തിക്കുമ്പോൾ ഇവർക്ക് 22 മുതൽ 25 രൂപ വരെ ലഭിക്കുന്നു. പൊതുവിതരണ വകുപ്പ് അധികൃതർ പറയുന്നതനുസരിച്ച് പാലക്കാട്, ഇടുക്കി ജില്ലാ അതിർത്തികളിലൂടെയും വലിയ തോതിൽ അരി തമിഴ്‌നാട്ടിൽ നിന്നും കേരളത്തിലെത്തുന്നുണ്ട്. സംഭവത്തിൽ ദക്ഷിണമേഖല റേഷനിങ് ഡെപ്യൂട്ടി കൺട്രോളർ സി വി മോഹന്കുമാറിന്റെ നേതൃത്വത്തിലുള്ള പ്രത്യേക സംഘം അന്വേഷണം തുടരുകയാണ്.