Asha Workers’ Protest: ‘പ്രതിഷേധിക്കേണ്ടത് ഡൽഹിയിൽ; വെട്ടിയ മുടി കേരളത്തിലെ കേന്ദ്രമന്ത്രിമാർ വഴി കേന്ദ്രസർക്കാരിന് കൊടുത്തയക്കണം’; വി. ശിവൻകുട്ടി
Sivankutty On Ashaworkers Strike:വെട്ടിയ തലമുടി കേരളത്തിൽ നിന്നുള്ള കേന്ദ്ര മന്ത്രിമാർ വഴി കേന്ദ്രസർക്കാരിന് കൊടുത്തയക്കണമെന്നും പ്രതിഷേധിക്കേണ്ടത് ഡൽഹിയിലാണെന്നും മന്ത്രി വി ശിവൻകുട്ടി പറഞ്ഞു.
തിരുവനന്തപുരം: സെക്രട്ടറിയേറ്റിന് മുന്നിൽ ആശ പ്രവർത്തകർ തലമുണ്ഡനം നടത്തി പ്രതിഷേധിച്ചതിൽ പ്രതികരിച്ച് മന്ത്രി വി ശിവൻകുട്ടി. വെട്ടിയ തലമുടി കേരളത്തിൽ നിന്നുള്ള കേന്ദ്ര മന്ത്രിമാർ വഴി കേന്ദ്രസർക്കാരിന് കൊടുത്തയക്കണമെന്നും പ്രതിഷേധിക്കേണ്ടത് ഡൽഹിയിലാണെന്നും മന്ത്രി വി ശിവൻകുട്ടി പറഞ്ഞു. കേന്ദ്ര മന്ത്രി സുരേഷ് ഗോപി കുടയും റെയിൻ കോട്ടും കൊടുത്തത് കൊണ്ടൊന്നും ആശാ വർക്കർമാർക്ക് ആനുകൂല്യങ്ങൾ ലഭിക്കില്ലെന്ന് മന്ത്രി കൂട്ടിച്ചേർത്തു.
പ്രതിഷേധത്തിൽ ബിജെപിയുടെ പ്രാദേശിക ജനപ്രതിനിധികൾ നുഴഞ്ഞുല കയറിയിട്ടുണ്ട്. കേന്ദ്ര തൊഴിൽ നിയമപ്രകാരം ആശാവർക്കർമാർ ഉൾപ്പെടെയുള്ള സ്കീം വർക്കർമാർക്ക് തൊഴിലാളി എന്ന പദവി നൽകണമെന്നും അതിന് അനുസരിച്ചുള്ള ആനുകൂല്യങ്ങൾക്ക് അർഹരാക്കണമെന്നും ആവശ്യപ്പെട്ട് കേന്ദ്ര തൊഴിൽ മന്ത്രിക്ക് കത്ത് അയച്ചിട്ടുണ്ടെന്നും എന്നാൽ ദിവസങ്ങൾ കഴിഞ്ഞിട്ടും ഇതുവരെ മറിപടി ലഭിച്ചിട്ടില്ലെന്നു മന്ത്രി പറഞ്ഞു. ആർജ്ജവമുണ്ടെങ്കിൽ സുരേഷ് ഗോപിയും ജോർജ് കുര്യനും കേന്ദ്രസർക്കാരിൽ സമ്മർദ്ദം ചെലുത്തി ഈ ആവശ്യം നടത്തിയെടുക്കണമെന്നും മന്ത്രി കൂട്ടിചേർത്തു.
Also Read:‘ഞങ്ങൾ മുടി മുറിച്ചു, സർക്കാർ ഞങ്ങളുടെ തല വെട്ടി മാറ്റട്ടെ’; പ്രതിഷേധം കടുപ്പിച്ച് ആശ പ്രവർത്തകർ
ആശ കേന്ദ്രാവിഷ്കൃത പദ്ധതിയായതിനാൽ ഇൻസെന്റീവ് നൽകുന്നതിൽ 60 ശതമാനം കേന്ദ്രവും 40 ശതമാനം സംസ്ഥാനവും ഫണ്ട് നൽകുന്നു. 3000 രൂപയായി നിശ്ചയിച്ച ഫിക്സഡ് ഇൻസെന്റീവ് തുകയിൽ 1800 രൂപ കേന്ദ്രവും 1200 രൂപ സംസ്ഥാനവുമാണ് നൽകുന്നത്. ഇത് കൂടാതെ 7000 രൂപ ഓണറേറിയവും നൽകുന്നുണ്ടെന്നും മന്ത്രി പറഞ്ഞു. ഇതിൽ സംസ്ഥാന സർക്കാർ നൽകുന്ന ഓണറേറിയം വർദ്ധിപ്പിക്കണമെന്ന ആവശ്യം അല്ലാതെ കേന്ദ്ര നൽകുന്ന ഇൻസെന്റീവ് വർദ്ധിപ്പിക്കണമെന്ന് സമർക്കാർ പറയുന്നില്ലെന്നും ഇത് ഇരട്ടത്താപ്പാണെന്നും മന്ത്രി വിമർശിച്ചു.
ആശവർക്കർ‌‌മാർക്കായി ആദ്യം ഓണറേറിയം പ്രഖ്യാപി‍ച്ചത് ഇടതുപക്ഷ സർക്കാരാണ്. യുഡിഎഫ് സർക്കാരിന്റെ കാലത്ത് 100 രൂപ മാത്രമായിരുന്നു പ്രതിമാസ ഓണറേറിയം. ഇത് 7000 രൂപയായി ഉയർത്തിയത് ഇടതുപക്ഷ സർക്കാരണ് എന്നാണ് മന്ത്രി പറയുന്നത്. ആശാവർക്കർമാർക്ക് 7,000 രൂപ മാത്രമാണ് ലഭിക്കുന്നു എന്നത് തെറ്റായ പ്രചരണമാണെന്നും നിശ്ചിത നിബന്ധനകൾ പ്രകാരം, ജോലിചെയ്യുന്ന ആശാവർക്കർമാർക്ക് ടെലഫോൺ അലവൻസ് ഉൾപ്പെടെ 13,200 രൂപ വരെ ലഭിക്കുന്നുണ്ട്. ഇതിൽ 10,000 രൂപ സംസ്ഥാന വിഹിതമാണെന്നും മന്ത്രി പറഞ്ഞു.
