KSRTC BUS: പുല്ലുപാറയിൽ കെഎസ്ർടിസി ബസ് കൊക്കയിലേക്ക് മറിഞ്ഞു; രക്ഷാപ്രവർത്തനം പുരോഗമിക്കുന്നു
KSRTC BUS Pullupara Accident: 30 അടിത്താഴ്ചയിലേക്കാണ് ബസ് മറഞ്ഞിരിക്കുന്നത്. പ്രദേശവാസികൾ, മറ്റ് യാത്രാക്കാർ എന്നിവരുടെ നേതൃത്വത്തിലാണ് സ്ഥലത്ത് ആദ്യം രക്ഷാപ്രവർത്തനം നടന്നത്.
ഇടുക്കി: പുല്ലുപാറയ്ക്ക് സമീപം കെഎസ്ആർടിസി ബസ് കൊക്കയിലേക്ക് മറിഞ്ഞു. അപടകത്തിൽ നിരവധി പേർക്ക് പരിക്കേറ്റു.
മാവേലിക്കരയിൽ നിന്ന് തഞ്ചാവൂരിലേക്ക് വിനോദയാത്രയ്ക്ക് പോയ സംഘം സഞ്ചരിച്ച ബസാണ് കൊക്കയിലേക്ക് മറിഞ്ഞത്. കുട്ടിക്കാനത്തിനും മുണ്ടക്കയത്തിനും ഇടയിലുള്ള സ്ഥലത്താണ് അപകടം. പരിക്കേറ്റവരെ ഹെെവേ പൊലീസും മോട്ടോർ വാഹന വകുപ്പും ചേർന്ന് ആശുപത്രിയിൽ എത്തിക്കാനുള്ള ശ്രമം തുടരുകയാണ്. ആരുടെയും പരിക്ക് ഗുരുതരമല്ലെന്നാണ് ലഭിക്കുന്ന വിവരം.
പരിക്കേറ്റവരെ 35-ാം മെെലിലുള്ള സ്വകാര്യ ആശുപത്രിയിലാണ് പ്രവേശിപ്പിച്ചിരിക്കുന്നത്. 30 അടിത്താഴ്ചയിലേക്കാണ് ബസ് മറഞ്ഞിരിക്കുന്നത്. താഴ്ചയിലേക്ക് മറിഞ്ഞ ബസ് മരത്തിൽ തട്ടി നിന്നതിനാലാണ് വൻ അപകടം ഒഴിവായത്. 36 പേരാണ് കെഎസ്ആർടിസി ബസിൽ ഉണ്ടായിരുന്നത്. രണ്ട് പേർ ബസ് ജീവനക്കാരാണ്. ഇന്ന് രാവിലെ 6.15-ന് പുല്ലുപാറയിലെ കൊടുംവളവിൽ വച്ചാണ് ബസ് കൊക്കയിലേക്ക് മറിഞ്ഞത്. ബ്രേക്ക് തകരാറാണ് ബസ് അപകടത്തിൽ പെടാൻ കാരണമെന്നാണ് പ്രാഥമിക നിഗമനം.
തഞ്ചാവൂരിൽ നിന്ന് മാവേലിക്കരയിലേക്ക് മടങ്ങും വഴിയായിരുന്നു അപകടം. ഇന്നലെ പുലർച്ചെ മൂന്ന് മണിക്കാണ് സംഘം തഞ്ചാവൂരിലേക്ക് പോയത്. ശബരിമലയിലേക്ക് പോകുന്ന ഈ ഭാഗം ദേശീയപാതയുടെ കൂടി ഭാഗമാണ്. പ്രദേശവാസികൾ, മറ്റ് യാത്രാക്കാർ എന്നിവരുടെ നേതൃത്വത്തിലാണ് സ്ഥലത്ത് ആദ്യം രക്ഷാപ്രവർത്തനം നടന്നത്. പിന്നാലെ ഫയർഫോഴ്സും മറ്റ് വകുപ്പുകളും സ്ഥലത്തെത്തുകയായിരുന്നു.
