Kalamassery Polytechnic Ganja Raid: എത്തിച്ചത് നാല് കഞ്ചാവ് പൊതികൾ; ബാക്കി എവിടെ? ഹോസ്റ്റൽ മിനി കഞ്ചാവ് വിപണന കേന്ദ്രം
Kalamassery Polytechnic College Hostel Drug Case: ഹോസ്റ്റൽ മിനി കഞ്ചാവ് വിപണന കേന്ദ്രമാണെന്നാണ് പോലീസ് പറയുന്നത്. കോളേജിന് അകത്ത് മാത്രമല്ല കളമശ്ശേരിയുടെ വിവിധ ഭാഗങ്ങളിൽ കഞ്ചാവ് എത്തിക്കുന്നത് ഇവിടെ നിന്നാണെന്നാണ് വിവരം.
കൊച്ചി: കളമശ്ശേരി സർക്കാർ പോളിടെക്നിക് ഹോസ്റ്റലിൽ നിന്ന് കഞ്ചാവ് കണ്ടെത്തിയ സംഭവത്തിൽ നടുക്കുന്ന വിവരങ്ങളാണ് പുറത്ത് വരുന്നത്. ഹോസ്റ്റലിലേക്ക് വിൽക്കാനായി നാല് കിലോയിലേറെ കഞ്ചാവ് എത്തിച്ചിരുന്നതായാണ് വിവരം. ഇതിൽ രണ്ട് കിലോ കഴിഞ്ഞ ദിവസം അറസ്റ്റിലായ കൊല്ലം കുളത്തുപ്പുഴ സ്വദേശി ആകാശിന്റെ മുറിയിൽ നിന്ന് ലഭിച്ചിരുന്നു. എന്നാൽ ബാക്കിയുള്ളത് എവിടെയാണെന്ന് കണ്ടെത്താനുള്ള ശ്രമത്തിലാണ് പോലീസ്.
അതേസമയം ഹോസ്റ്റൽ മിനി കഞ്ചാവ് വിപണന കേന്ദ്രമാണെന്നാണ് പോലീസ് പറയുന്നത്. കോളേജിന് അകത്ത് മാത്രമല്ല കളമശ്ശേരിയുടെ വിവിധ ഭാഗങ്ങളിൽ കഞ്ചാവ് എത്തിക്കുന്നത് ഇവിടെ നിന്നാണെന്നാണ് വിവരം. കഴിഞ്ഞ ദിവസം പിടിയിലായ പൂർവവിദ്യാർത്ഥി ആഷിക് ആണ് പ്രധാന ലഹരി ഇടപാടുകാരൻ. ഹോസ്റ്റലിൽ പോലീസ് പരിശോധന നടത്തില്ലെന്ന ഉറപ്പിലാണ് ഇവർ ഇവിടെ കഞ്ചാവ് സൂക്ഷിച്ചത്.
Also Read:കളമശേരി പോളിടെക്നിക്ക് ലഹരിക്കേസ്; പണമിടപാട് നടത്തിയ മൂന്നാം വർഷ വിദ്യാർത്ഥിക്കായി തെരച്ചിൽ ഊർജിതം
ഇതരസംസ്ഥാനക്കാരും അല്ലാത്തവരുമായ ലഹരിമാഫിയ സംഘമാണ് കഞ്ചാവ് എത്തിച്ച് നൽകുന്നത്. കിലോയ്ക്ക് പതിനായിരം രൂപ നിരക്കിലാണ് കഞ്ചാവ് വാങ്ങിയതെന്നാണ് പിടിയിലായവരുടെ മൊഴി. അതേസമയം പണമിടപ്പാട് നടത്തുന്ന കൊല്ലം സ്വദേശിയായ മൂന്നാം വർഷം വിദ്യാർത്ഥിക്കായി തെരച്ചിൽ ഊർജിതമാക്കിയിട്ടുണ്ട്.
ഹോസ്റ്റലിൽ ലഹരി ഉപയോഗിക്കുന്നവർ ഒരു ഗ്യാങ് ആണെന്നാണ് പോലീസ് പറയുന്നത്. ഇവരുള്ളതിനാൽ വിദ്യാർത്ഥി സംഘടനകൾക്കടക്കം ഹോസ്റ്റലിനുള്ളിൽ ഒരു സ്വാധീനവുമില്ലെന്നും പോലീസ് പറയുന്നു. കഞ്ചാവ് നിറച്ച ബീഡികളാണ് വിദ്യാർത്ഥികൾ വലിക്കുന്നതെന്നാണ് പോലീസ് പറയുന്നത്. ഇവിടെ നിന്ന് വൻതോതിൽ ബീഡിക്കെട്ടുകള്‍ കണ്ടെത്തിയിരുന്നു.
