Cholera Death: തിരുവനന്തപുരത്ത് കോളറ ബാധിച്ച് മരണം; ആശങ്കപ്പെടേണ്ടെന്ന് ആരോഗ്യ വകുപ്പ്
Cholera Death: ഈ മാസം ഇരുപതിന് സ്വകാര്യ ആശുപത്രിയിൽ വച്ചായിരുന്നു മരണം. പനിയെ തുടർന്ന് ഈ മാസം 17നായിരുന്നു ആശുപത്രിയിൽ പ്രവേശിപ്പിച്ചത്.
തിരുവനന്തപുരം: കേരളത്തിൽ കോളറ ബാധിച്ച് ഒരു മരണം. തിരുവനന്തപുരം കവടിയാർ സ്വദേശിയും കാർഷിക ഉദ്യോഗസ്ഥനുമായ 63കാരനാണ് മരിച്ചത്. മരണാനന്തരം നടത്തിയ രക്ത പരിശോധനയിലാണ് കോളറ സ്ഥിരീകരിച്ചത്.
ഈ മാസം ഇരുപതിന് സ്വകാര്യ ആശുപത്രിയിൽ വച്ചായിരുന്നു മരണം. പനിയെ തുടർന്ന് ഈ മാസം 17നായിരുന്നു ആശുപത്രിയിൽ പ്രവേശിപ്പിച്ചത്. നിലവിൽ ആശങ്കപ്പെടേണ്ട സാഹചര്യമില്ലെന്ന് ആരോഗ്യവകുപ്പ് അറിയിച്ചു. മറ്റ് കേസുകളൊന്നും റിപ്പോർട്ട് ചെയ്തിട്ടില്ല.
ആരോഗ്യവകുപ്പിന്റെ വെബ്സൈറ്റിലാണ് ഇത് സംബന്ധിച്ച വിവരങ്ങൾ നൽകിയിട്ടുള്ളത്. സമീപകാലത്ത് ഇദ്ദേഹം ദീർഘദൂര യാത്രകൾ നടത്തിയതായി വിവരമില്ല. തിരുവനന്തപുരം, കൊല്ലം ജില്ലകളിൽ മാത്രമാണ് യാത്ര നടത്തിയിട്ടുള്ളത്. കുടുംബാംഗങ്ങൾക്കോ അദ്ദേഹവുമായി സമ്പർക്കം പുലർത്തിയ മറ്റുള്ളവർക്കോ രോഗലക്ഷണങ്ങൾ ഇല്ലെന്ന് ആരോഗ്യവകുപ്പ് അറിയിച്ചു.
എന്താണ് കോളറ?
വിബ്രിയോ കോളറേ എന്ന ബാക്ടീരിയ നിമിത്തമുണ്ടാകുന്ന രോഗമാണ് കോളറ. വയറിളക്കമാണ് പ്രധാന രോഗലക്ഷണം. ശരീരത്തിലെ ജലാംശം പെട്ടെന്ന് കുറയുന്നതാണ് ഗുരുതരാവസ്ഥയ്ക്ക് കാരണം.
