Man Kills Wife: ഭാര്യയ്ക്ക് അവിഹിത ബന്ധമുണ്ടെന്ന് സംശയം; യുവതിയെ ചുറ്റികകൊണ്ട് തലയ്ക്കടിച്ചുകൊന്നു; ഭർത്താവ് അറസ്റ്റിൽ

നൂറുള്ള ഹൈദർ, അസ്മ ഖാൻ

നോയിഡ: അവിഹിത ബന്ധമുണ്ടെന്ന് സംശയിച്ച് ഭാര്യയെ തലയ്ക്കടിച്ച് കൊലപ്പെടുത്തിയ ഭർത്താവ് അറസ്റ്റിൽ. നോയിഡയിലെ സെക്ടറിൽ 15ലാണ് സംഭവം. നൂറുള്ള ഹൈദർ എന്ന 55കാരനാണ് ഭാര്യയായ അസ്മ ഖാനെ (42) ചുറ്റിക ഉപയോഗിച്ച് തലയ്ക്കടിച്ച് കൊലപ്പെടുത്തിയത്. സംഭവത്തിൽ നൂറുള്ള ഹൈദറിനെ പോലീസ് കസ്റ്റഡിയിലെടുത്തു.

വെള്ളിയാഴ്ചയാണ് കേസിനാസ്പദമായ സംഭവം നടന്നത്. ഒരു സ്വകാര്യ സ്ഥാപനത്തിൽ സോഫ്റ്റ്‌വെയർ എൻജിനീയറായി ജോലി ചെയ്യുകയായിരുന്നു അസ്മ ഖാൻ. ബീഹാർ സ്വദേശിയായ നൂറുള്ളയും എൻജിനീയറിങ് ബിരുദധാരിയാണ്. എന്നാൽ നിലവിൽ തൊഴിൽരഹിതനാണ്. 2005ലാണ് ഇരുവരും വിവാഹിതരായത്. ഇവർക്ക് ഒരു മകനും മകളുമാണ് ഉള്ളത്. കുറ്റകൃത്യം നടന്നതിന് പിന്നാലെ ദമ്പതിമാരുടെ എൻജിനീയറിങ് വിദ്യാർത്ഥിയായ മകനാണ് പോലീസിനെ വിവരം അറിയിച്ചത്.

വിവരം അറിഞ്ഞ ഉടനെ പോലീസും ഫോറൻസിക് വിദഗ്ധരും അടങ്ങുന്ന സംഘം സംഭവ സ്ഥലത്തെത്തി. തുടർന്ന് നൂറുള്ള ഹൈദറിനെ പോലീസ് അറസ്റ്റ് ചെയ്യുകയായിരുന്നു. ഭാര്യയ്ക്ക് അവിഹിത ബന്ധമുണ്ടെന്ന സംശയമാണ് കൊലപാതകത്തിലേക്ക് നയിച്ചതെന്നാണ് പോലീസിന്റെ പ്രാഥമിക നിഗമനം. മൃതദേഹം പോസ്റ്റ്‌മോർട്ടത്തിന് അയച്ചിരിക്കുകയാണെന്നും അന്വേഷണം പുരോഗമിക്കുകയാണെന്നും പോലീസ് അറിയിച്ചു.

ALSO READ: കാണാതായ കുട്ടിയെ കണ്ടെത്താൻ സഹായിച്ചത് തെരുവ് നായ; മൃതദേഹം മൺകൂനയ്ക്കുള്ളിൽ

കാണാതായ കുട്ടിയുടെ മൃതദേഹം കണ്ടെത്താൻ സഹായിച്ചത് തെരുവ് നായ

കേന്ദ്ര ഭരണ പ്രദേശമായ ദാദ്ര-നഗർ ഹവേലിയിലെ സിൽവാസയിൽ നിന്ന് കാണാതായ ആൺകുട്ടിയുടെ മൃതദേ​​ഹം കണ്ടെത്താൻ സഹായിച്ചത് തെരുവ് നായ. കുട്ടിയുടെ കൂടെ കളിക്കാറുണ്ടായിരുന്ന തെരുവ് നായയുടെ സഹായത്തോടെയാണ് മൃതദേഹം കണ്ടെത്തിയത്. ചൊവ്വാഴ്ച വൈകുന്നേരം കളിക്കാൻ പോയ കുട്ടി തിരിച്ച് വരാതിരുന്നതിനെ തുടർന്ന് കുട്ടിയുടെ പിതാവ് പോലീസിൽ പരാതി നൽകുകയായിരുന്നു. തുടർന്ന് പോലീസ് നടത്തിയ തിരച്ചിലിൽ വീട്ടിൽ നിന്ന് 60 മീറ്റർ അകലെയുള്ള മണൽക്കൂനയിൽ കുട്ടിയുടെ മൃതദേഹം കുഴിച്ചിട്ട നിലയിൽ കണ്ടെത്തി.

പ്രദേശത്തെ സിസിടിവി ദൃശ്യങ്ങൾ ഉൾപ്പെടെ പോലീസ് പരിശോധിച്ചിരുന്നു. അതിൽ കുട്ടി ഒരു തെരുവ് നായയുമായി കളിക്കുന്നതിൻറെ ദൃശ്യങ്ങളും ലഭിച്ചിരുന്നു. ഇതേകുറിച്ച് അന്വേഷിച്ചപ്പോൾ കുട്ടി അതിനൊപ്പം കളിക്കാറുണ്ടെന്നും ഭക്ഷണം നൽകാറും ഉണ്ടെന്നും പ്രദേശവാസികൾ പറഞ്ഞു. അങ്ങനെയാണ് അന്വേഷണം നായയിലേക്ക് തിരിച്ചത്. നായയെ കണ്ടെത്തുമ്പോൾ അത് കുട്ടിയെ കുഴിച്ചിട്ടിരിക്കുന്ന മൺകൂനയ്ക്ക് മുകളിൽ നിൽക്കുകയായിരുന്നു. പരിശോധിച്ചപ്പോൾ മണ്ണിനടിയിൽ നിന്ന് മൃതദേഹം കണ്ടെത്തി.