MLA Gurpreet Gogi: പഞ്ചാബിൽ എംഎൽഎ ഗുർപ്രീത് ഗോഗി വീടിനുള്ളിൽ വെടിയേറ്റ് മരിച്ചനിലയിൽ
AAP MLA Gurpreet Gogi Found Dead: ലുധിയാന വെസ്റ്റ് മണ്ഡലത്തില്‍ നിന്നുള്ള എംഎൽഎ ഗുർപ്രീത് ഗോഗിയെ വീട്ടിൽ വെടിയേറ്റ് മരിച്ചനിലയിൽ കണ്ടെത്തി. മരണകാരണം വ്യക്തമല്ലെന്ന് പോലീസ് അറിയിച്ചു.
എംഎല്‍എ ഗുർപ്രീത് ഗോഗി
ചണ്ഡീഗഢ്: പഞ്ചാബിലെ ആം ആദ്മി പാര്‍ട്ടി എംഎല്‍എ ഗുർപ്രീത് ഗോഗിയെ വീട്ടിൽ വെടിയേറ്റ് മരിച്ചനിലയിൽ കണ്ടെത്തി. ലുധിയാന വെസ്റ്റ് മണ്ഡലത്തില്‍ നിന്നുള്ള എംഎൽഎ ആണ് ഗോഗി. വെള്ളിയാഴ്ച അർധ രാത്രിയോടെയാണ് സംഭവം. വെടിയേറ്റ ഉടൻ എംഎൽഎയെ ദയാനന്ദ് മെഡിക്കൽ കോളജ് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. പോസ്റ്റ്മാർട്ടത്തിനായി മൃതദേഹം മോർച്ചറിയിൽ സൂക്ഷിച്ചിരിക്കുകയാണ്.
ആം ആദ്മി പാര്‍ട്ടി ജില്ലാ പ്രസിഡൻ്റ് ശരൺപാൽ സിംഗ് മക്കർ, പോലീസ് കമ്മീഷണർ കുൽദീപ് സിംഗ് ചഹാൽ എന്നിവർ ഗോഗിയുടെ മരണം സ്ഥിരീകരിച്ചു. എംഎൽഎ ആത്മഹത്യ ചെയ്തതാണോ, അബദ്ധത്തിൽ വെടിയേറ്റതാണോ എന്ന് പോസ്റ്റ്മാർട്ടത്തിന് ശേഷം വ്യക്തമാക്കുമെന്ന് കമ്മീഷണർ അറിയിച്ചു.
പകൽ സമയത്തെ പതിവ് പരിപാടികൾക്ക് ശേഷം രാത്രിയോടെ എംഎൽഎ ഗുർപ്രീത് ഗോഗി, ഘുമര്‍ മണ്ഡിയിലെ സ്വന്തം വീട്ടിലേക്ക് മടങ്ങിയതായി എഎപി ജില്ലാ സെക്രട്ടറി പരംവീര്‍ സിംഗ് പറഞ്ഞു. ഭാര്യയ്ക്കും മകനും മകള്‍ക്കുമൊപ്പമാണ് ഗോഗി താമസിക്കുന്നത്. വെടിയൊച്ച കേട്ട് ഭാര്യ ഡോ. സുഖ്ചെയിന്‍ കൗര്‍ വന്ന് നോക്കിയപ്പോൾ രക്തത്തില്‍ കുളിച്ച നിലയിൽ ഗുർപ്രീതിനെ കണ്ടെത്തുകയായിരുന്നു എന്ന് വൃത്തങ്ങള്‍ അറിയിച്ചു. സുരക്ഷാ ഉദ്യോഗസ്ഥരുടെ സഹായത്തോടെ രാത്രി 12 മണിയോടെയാണ് കുടുംബം ഗോഗിയെ ദയാനന്ദ് മെഡിക്കല്‍ കോളേജ് ആശുപത്രിയില്‍ എത്തിച്ചത്. എന്നാൽ, ആശുപത്രിയില്‍ എത്തുന്നതിന് മുൻപേ മരണം സംഭവിച്ചതായി ആശുപത്രി അധികൃതർ വ്യക്തമാക്കി.
ALSO READ: ‘ഞാൻ മനുഷ്യനാണ് ദൈവമല്ല, തെറ്റുകൾ സംഭവിക്കാം’: പോഡ്കാസ്റ്റിൽ മോദി
2022ൽ എംഎൽഎ ആകുന്നതിന് മുൻപ് ഗുർപ്രീത് ഗോഗി രണ്ടു തവണ എംസി കൗൺസിലറായും സേവനമനുഷ്ഠിച്ചു. കോൺഗ്രസ് ജില്ലാ (അർബൻ) പ്രസിഡന്റായിരുന്ന അദ്ദേഹം, 2022 ലെ വിധാൻ സഭാ തിരഞ്ഞെടുപ്പിന് മുൻപായാണ് ആംആദ്മി പാർട്ടിയിൽ ചേർന്നത്. 2024 നിയമസഭാ തിരഞ്ഞെടുപ്പിൽ തന്റെ അമ്മ പർവീൺ ബസ്സി സമ്മാനിച്ച സ്‌കൂട്ടറിൽ ഭാര്യയ്‌ക്കൊപ്പം നാമനിർദേശ പത്രിക സമർപ്പിക്കാൻ ഗോഗി പോയത് വലിയ ചർച്ചയിരുന്നു.
അതേസമയം, ഇന്നലെ ലുധിയാന ബാർ അസോസിയേഷൻ സംഘടിപ്പിച്ച ലോഹ്രി ചടങ്ങിൽ നിയമസഭാ സ്പീക്കർ കുൽതാർ സാന്ധവാനൊപ്പം ഗോഗിയും പങ്കെടുത്തിരുന്നു. കൂടാതെ പ്രാചിന്‍ ഷീറ്റ്ല മാതാ മന്ദിറും അദ്ദേഹം സന്ദർശിച്ചിരുന്നു.