Chhattisgarh Maoist Attack: ഛത്തീസ്ഗഢിൽ ഏറ്റുമുട്ടൽ; ഏഴ് മാവോയിസ്റ്റുകളെ സുരക്ഷാ ഉദ്യോഗസ്ഥർ വധിച്ചു
Chhattisgarh Maoist Attack: ഈ സംഭവത്തോടുകൂടി സംസ്ഥാനത്ത് ഈ വർഷം ഏറ്റുമുട്ടലുകളിൽ കൊല്ലപ്പെട്ട മാവോവാദികളുടെ എണ്ണം 125 ആയി.
Maoist Attack In Chhattisgarh
നാരായൺപുർ: ഛത്തീസ്ഗഢിലെ നാരായൺപുർ ജില്ലയിൽ സുരക്ഷാ ഉദ്യോഗസ്ഥരും മാവോയിസ്റ്റുകളും തമ്മിൽ ഏറ്റുമുട്ടൽ. സംഭവത്തിൽ സുരക്ഷാ ഉദ്യോഗസ്ഥർ ഏഴ് മാവോവാദികളെ വധിച്ചതായാണ് റിപ്പോർട്ട്. ഏറ്റുമുട്ടലിൽ മൂന്ന് ജവാന്മാർക്ക് പരിക്കേറ്റിട്ടുണ്ട്. വെള്ളിയാഴ്ച ഉച്ചയോടെ ഓർച്ച മേഖലയിലെ വനത്തിലാണ് ഏറ്റുമുട്ടലുണ്ടായത്.
ALSO READ: മരിച്ചയാൾ തിരിച്ചു വരേണ്ടിവന്നു നിരപരാധിത്വം തെളിയാൻ… ഇത് 24 വർഷം നീണ്ട പോരാട്ടവിജയം
കൊല്ലപ്പെട്ട മാവോയിസ്റ്റുകളെ തിരിച്ചറിഞ്ഞിട്ടില്ല. ഇതോടെ, സംസ്ഥാനത്ത് ഈവർഷം ഏറ്റുമുട്ടലുകളിൽ കൊല്ലപ്പെട്ട മാവോവാദികളുടെ എണ്ണം 125 ആയി. വൈകിട്ട് മൂന്നുമണിയോടെ ഒർച്ച പ്രദേശത്തെ ഗ്രാമവനത്തിൽവെച്ചായിരുന്നു സുരക്ഷാ ഉദ്യോഗസ്ഥരും മാവോയിസ്റ്റുകളും തമ്മിൽ ഏറ്റുമുട്ടൽ ആരംഭിച്ചതെന്നാണ് വിവരം.
മാവോയിസ്റ്റ് വിരുദ്ധ ഓപ്പറേഷന്റെ ഭാഗമായാണ് സുരക്ഷാ ഉദ്യോഗസ്ഥർ എത്തിയത്. യൂണിഫോം ധരിച്ച നിലയിലായിരുന്നു മാവോയിസ്റ്റുകളുടെ മൃതദേഹങ്ങൾ. ഇവരെ ആരെയും തിരിച്ചറിഞ്ഞിട്ടില്ല. സ്ഥലത്തുനിന്ന് ചില ആയുധങ്ങളും കണ്ടെത്തി. വെടിവയ്പ്പിൽ പരിക്കേറ്റ മൂന്ന് ജവാന്മാരെ ആശുപത്രിയിൽ പ്രവേശിപ്പിച്ചു.