Shine Tom Chacko: ഷൈനിനു വേണ്ടി വ്യാപക തിരച്ചിൽ, വിൻസിയുടെ പരാതി അന്വേഷിക്കാൻ ‘അമ്മ’
Shine Tom Chacko - Vincy Aloshious: ഡാൻസാഫ് സംഘം ഹോട്ടലിൽ എത്തിയതറിഞ്ഞ് ഷൈൻ മൂന്നാം നിലയിൽ നിന്ന് ഇറങ്ങി ഓടുകയായിരുന്നു. ഷൈനിൻ്റെ കൊച്ചിയിലെ ഫ്ളാറ്റിൽ പൊലീസ് സംഘം എത്തിയെങ്കിലും നടനെ കണ്ടെത്താനായില്ല.
നടൻ ഷൈൻ ടോം ചാക്കോയ്ക്കായി തിരച്ചിൽ ഊർജ്ജിതമാക്കി പൊലീസ്. കഴിഞ്ഞ ദിവസം കൊച്ചിയിലെ കലൂരിലുള്ള പിജിഎസ് വേദാന്ത ഹോട്ടലിൽ നടന്ന ലഹരി പരിശോധനയ്ക്കിടെയാണ് നടൻ രക്ഷപ്പെട്ടത്.
നടനും സംഘവും ലഹരി ഉപയോഗിക്കുന്നുവെന്ന രഹസ്യം വിവരത്തെ തുട‍ർന്നായിരുന്നു പരിശോധന. എന്നാൽ ഡാൻസാഫ് സംഘം ഹോട്ടലിൽ എത്തിയതറിഞ്ഞ് ഷൈൻ മൂന്നാം നിലയിൽ നിന്ന് ഇറങ്ങി ഓടുകയായിരുന്നു. ഷൈനിൻ്റെ കൊച്ചിയിലെ ഫ്ളാറ്റിൽ പൊലീസ് സംഘം എത്തിയെങ്കിലും നടനെ കണ്ടെത്താനായില്ല.
അതേസമയം നടി വിൻസി അലോഷ്യസിന്റെ പരാതിയിൽ അന്വേഷണം നടത്താൻ സിനിമ സംഘടന അമ്മ തീരുമാനിച്ചു. സിനിമാ സെറ്റില്‍ ലഹരി ഉപയോഗിച്ച് നടൻ മോശമായി പെരുമാറിയെന്ന നടിയുടെ പരാതി അമ്മയുടെ മൂന്നംഗ സമിതി അന്വേഷിക്കും. സരയൂ, അൻസിബ, വിനുമോഹൻ എന്നിവരാണ് പരാതി അന്വേഷിക്കുക. പരാതി അന്വേഷിച്ച് ഇന്ന് തന്നെ റിപ്പോർട്ട് നൽകാൻ മൂന്നംഗസമിതിയോട് നിർദ്ദേശിച്ചു. റിപ്പോർട്ടിന്റെ അടിസ്ഥാനത്തിൽ ഉടൻ നടപടി എടുക്കുമെന്നും അമ്മ വ്യക്തമാക്കി.
അതിനിടെ ഷൈൻ ടോം ചാക്കോയുടെ പേര് പുറത്തുവന്നതിന് പിന്നാലെ ആദ്യ പ്രതികരണവുമായി നടി വിൻസി അലോഷ്യസ് രംഗത്തെത്തി. വളരെ രഹസ്യമായിട്ടാണ് പരാതി നൽകിയതെന്നും അത് എങ്ങനെ പുറത്ത് വന്നതെന്ന് അറിയില്ലെന്നും നടി പറഞ്ഞു. നടന്റെയോ സിനിമയുടെയോ പേര് പറയാൻ ഉദ്ദേശിച്ചിട്ടില്ല, ആരോപണം നടനെതിരെ മാത്രമാണ് സിനിമയ്‌ക്കെതിരെ അല്ലെന്നും നടി പ്രതികരിച്ചു. സംഭവത്തിന് പിന്നാലെ സംവിധായകൻ നടന് താക്കീത് നൽകിയിരുന്നുവെന്നും ഏഷ്യാനെറ്റ് ന്യൂസിനോട് വിൻസി പറഞ്ഞു.
