Veer Zaara Movie: ഓൾഡ് ഈസ് ഗോൾഡ് എന്നാണല്ലോ; 20 വർഷങ്ങൾക്ക് മുമ്പ് റിലീസായ ആ ചിത്രം ഇന്ന് നൂറുകോടി ക്ലബ്ബിൽ, ഇത് ചരിത്രം

റീ-റിലീസ് ചിത്രങ്ങളുടെ കാലമാണിതെന്ന് പറയാം. 2024-ൽ തന്നെ പല ഭാഷകളിലായി നിരവധി സിനിമകളാണ് റീ-റിലീസ് ചെയ്തത്. അതിൽ ഭൂരിഭാഗം സിനിമകളും വലിയ വിജയം കൈവരിക്കുകയും ചെയ്തു. എന്നാൽ, റീ-റിലീസ് കളക്ഷന്റെ റെക്കോർഡ് തിരുത്തി എഴുതിയിരിക്കുകയാണ് ബോളിവുഡ് ചിത്രമായ ‘വീർ സാറ’. ഒരു റീ-റിലീസ് ചിത്രം ആഗോള ബോക്സ് ഓഫീസിൽ 100 കോടി കളക്ഷൻ നേടുന്നത് ഇതാദ്യമായാണ്.

റൊമാന്റിക് ക്ലാസിക് ചിത്രമായ ‘വീർ സാറ’ ഈ മാസം 13-ആം തീയതിയാണ് റീ-റിലീസ് ചെയ്തത്. ഇന്ത്യയിലെ തിരഞ്ഞെടുത്ത തീയറ്ററുകളിൽ ആയിരുന്നു ചിത്രം എത്തിയത്. ആദ്യം റിലീസ് ചെയ്ത സമയത്ത് ഇന്ത്യയിൽ നിന്ന് 61 കോടിയും വിദേശത്ത് നിന്ന് 37 കോടിയുമാണ് ചിത്രം സ്വന്തമാക്കിയത്. വീണ്ടും റിലീസ് ചെയ്തപ്പോൾ നേടിയത് 2.5 കോടി രൂപയും. ഇതോടെയാണ് ‘വീർ സാറ’ ഇപ്പോൾ നൂറ് കോടി ക്ലബ്ബിൽ ഇടം നേടിയിരിക്കുന്നത്. ചിത്രം ഇപ്പോൾ രണ്ടാം വാരത്തിലേക്ക് കടക്കുമ്പോൾ, തീയറ്ററിൽ വിജയകരമായി തന്നെ മുന്നേറുന്നു.

ഷാരൂഖ് ഖാനെ നായകനാക്കി യഷ് ചോപ്ര സംവിധാനം ചെയ്ത ചിത്രമാണ് ‘വീർ സാറ’. യഷ് രാജ് ഫിലിംസ് നിർമ്മിച്ച ചിത്രത്തിൽ നായികമാരായി എത്തിയത് പ്രീതി സിന്റയും റാണി മുഖർജിയുമായിരുന്നു. മനോജ് ബാജ്പേയ്, ബോമൻ ഇറാനി, കിരൺ ഖേർ, അനുപം ഖേർ, ദിവ്യ ദത്ത എന്നിവരും ചിത്രത്തിൽ പ്രധാന വേഷങ്ങളെ അവതരിപ്പിച്ചു. കൂടാതെ അമിതാഭ് ബച്ചൻ, ഹേമ മാലിനി എന്നിവർ ചിത്രത്തിൽ കാമിയോ റോളിൽ എത്തിയിരുന്നു. ‘ഡർ’, ‘ദിൽ തോ പാഗൽ’ എന്നീ ചിത്രങ്ങൾക്ക് ശേഷം യഷ് ചോപ്രയും ഷാറുഖ് ഖാനും ഒന്നിച്ച ചിത്രമായിരുന്നു ‘വീർ സാറ’.

പാകിസ്ഥാൻ സ്വദേശിയായ യുവതിയെ പ്രണയിക്കുന്ന ഇന്ത്യൻ സൈനികന്റെ കഥയാണ് ചിത്രം പറയുന്നത്. ഇതിൽ ഇന്ത്യൻ സൈനികനായി ഷാരൂഖും പാകിസ്ഥാൻ സ്വദേശിയായി പ്രീതി സിന്റയുമാണ് എത്തിയത്. പാക് ജയിലിൽ കഴിയുന്ന നായകനെ പുറത്തെത്തിച്ച് നായികയുമായി ചേരാൻ അവസരം ഒരുക്കുന്ന കഥാപാത്രമാണ് റാണി മുഖർജിയുടേത്.