Supriya Menon: ‘ചരിത്രം കുറിക്കുന്നു, പൃഥ്വിരാജിനെ ഓർത്ത് അഭിമാനം’; ചർച്ചയായി സുപ്രിയയുടെ പോസ്റ്റ്

വിവാദങ്ങൾക്കിടെ നടനും സംവിധായകനുമായ പൃഥ്വിരാജിന് പിന്തുണയുമായി ഭാര്യ സുപ്രിയ മോനോൻ. ചിത്രം ആ​ഗോളതലത്തിൽ 200 കോടി ക്ലബിൽ ഇടംപിടിച്ചെന്ന പോസ്റ്റർ പങ്കുവച്ച് കൊണ്ടാണ് പൃഥ്വിരാജിന് അഭിനന്ദനവുമായി സുപ്രിയ എത്തിയത്. ചരിത്രം കുറിക്കുകയാണെന്നും, പൃഥ്വിരാജിനെ ഓർത്ത് അഭിമാനം ഉണ്ടെന്നും ഇൻസ്റ്റാ​ഗ്രം സ്റ്റാറിയിൽ സുപ്രിയ കുറിച്ചു. താരവും കുടുംബവും വലിയ രീതിയിൽ സൈബർ ആക്രമണം നേരിടുന്നതിനിടെയാണ് പിന്തുണയറിയിച്ച് കൊണ്ട് സുപ്രിയ രം​ഗത്ത് എത്തിയത്.

കഴിഞ്ഞ ദിവസം മല്ലിക സുകുമാരനും മകൻ പൃഥ്വിരാജിനെ പിന്തുണയുമായി രം​ഗത്ത് എത്തിയിരുന്നു. പൃഥ്വിരാജ് എന്ന സംവിധായകന് ആരെയും ചതിച്ചിട്ടില്ലെന്നും ഇനി ചതിക്കുകയും ഇല്ലെന്നും മല്ലിക സുകുമാരൻ പറഞ്ഞിരുന്നു. മോഹൻലാലിനും ആന്റണിക്കും അറിയാത്ത ഒരു കാര്യവും ഈ സിനിമയിൽ ഇല്ലെന്നും അവർ ഒരിക്കലും ഇങ്ങനെ പറയുകയില്ലെന്നും മല്ലിക പറഞ്ഞു. ഥ്വിരാജിനെ ബലിയാടാക്കി എന്തെങ്കിലും നേട്ടം ഉണ്ടാക്കാം എന്ന ധാരണ ഒന്നും ആർക്കും വേണ്ടെന്നും ഫേസ്ബുക്കിൽ പങ്കുവച്ച കുറിപ്പിൽ പറഞ്ഞിരുന്നു.

Also Read:‘വെറും ഡ്രാമയാണ്, കച്ചവടത്തിന് വേണ്ടിയുള്ള ഡ്രാമ; എമ്പുരാൻ മുറിക്കാൻ ആരും ആവശ്യപ്പെട്ടിട്ടില്ല’; സുരേഷ് ​ഗോപി

ഇതിനു പിന്നാലെ വലിയ രീതിയിലുള്ള സൈബർ ആക്രമണമാണ് മല്ലിക സുകുമാരനും പൃഥ്വിരാജിന്റെ ഭാര്യ സുപ്രിയയ്ക്കും നേരെയുണ്ടായത്. ‘മല്ലിക സുകുമാരന്റെ മരുമകൾ സുപ്രിയ മേനോൻ അർബൻ നക്സലാണ്. ആദ്യം ആ അഹങ്കാരിയെ നിലയ്ക്ക് നിർത്താനാണ് അമ്മായിയമ്മ ശ്രമിക്കേണ്ടത്’, എന്നാണു ബിജെപി നേതാവ് ബി. ഗോപാലകൃഷ്ണൻ പറഞ്ഞത്.

അതേസമയം ചിത്രത്തിലെ 24 ഭാ​ഗങ്ങൾ വെട്ടിമാറ്റിയതായാണ് റിപ്പോർട്ട്. ഇന്ന് റീ എഡിറ്റിംഗ് സെന്‍സര്‍ രേഖ പുറത്ത് വന്നതോടെയാണ് ചിത്രത്തിൽ കൂടുതൽ വെട്ടുകൾ നടന്നതായി കണ്ടെത്തിയത്. രണ്ട് മിനിറ്റാണ് എഡിറ്റ് ചെയ്തത്. റീ എഡിറ്റഡ് വേര്‍ഷന്‍ ഇന്ന് വൈകുന്നേരത്തോടെ വരുമെന്നാണ് സൂചന.