Actress Sithara: 51-ാം വയസ്സിലും അവിവാഹിത; കല്യാണം കഴിക്കാത്തതിന് പിന്നുള്ള കാരണം വെളിപ്പെടുത്തി നടി സിത്താര
Actress Sithara About Being Single: ഒറ്റയ്ക്കുള്ള ഈ ജീവിതത്തിൽ സന്തുഷ്ടയാണെന്ന് നടി സിത്താര. കല്യാണാലോചനകൾ വന്നെങ്കിലും മാതാപിതാക്കൾ കാരണം വേണ്ടെന്ന് വെച്ചു.
മലയാളികൾക്ക് ഏറ്റവും പ്രിയപ്പെട്ട മുൻകാല നടിമാരിൽ ഒരാളാണ് സിത്താര. മലയാളത്തിനൊപ്പം തമിഴിലും തെലുങ്കിലും നടി സജീവമായി പ്രവർത്തിച്ചിരുന്നു. 1986 ൽ ‘കാവേരി’ എന്ന മലയാളം ചിത്രത്തിലൂടെയാണ് താരം സിനിമ രംഗത്ത് അരങ്ങേറ്റം കുറിക്കുന്നത്. ആ സിനിമയോടെ 1980-90 കാലഘട്ടത്തിലെ ഏറ്റവും തിരക്കേറിയ നടിമാരിൽ ഒരാളായി മാറി.
ഇന്നും യൗവ്വനം കാത്തുസൂക്ഷിക്കുന്ന സിത്താരയ്ക്ക് ഈ വർഷം 51 വയസ് പൂർത്തിയായെങ്കിലും, നടി വിവാഹം കഴിച്ചിട്ടില്ല. പല ടിവി പരിപാടികളിലും മറ്റും ഇതേ കുറിച്ച് ചോദ്യങ്ങൾ ഉയർന്നെങ്കിലും, അവിവാഹിതയായി തുടരാനുള്ള കാരണം താരം വ്യക്തമാക്കിയിരുന്നില്ല. എന്നാൽ അടുത്തിടെ ഒരു അഭിമുഖത്തിൽ വെച്ച് തന്റെ ആ തീരുമാനത്തെ കുറിച്ച് നടി മനസ് തുറക്കുകയുണ്ടായി. ഒരുപാട് കല്യാണാലോചനകൾ തനിക്ക് വന്നെങ്കിലും മാതാപിതാക്കൾ കാരണമാണ് താനൊരു വിവാഹത്തെ കുറിച്ച് ചിന്തിക്കാതിരുന്നതെന്ന് താരം വെളിപ്പെടുത്തി.
ALSO READ: മേഘ്നാ രാജ് വീണ്ടും മലയാളത്തിൽ; തിരിച്ചു വരവ് ഹന്നയിലൂടെ
വൈധ്യുതി ബോർഡിൽ ഉദ്യോഗസ്ഥർ ആയിരുന്ന മാതാപിതാക്കളോട് വളരെ അധികം അടുപ്പം കാത്തുസൂക്ഷിച്ചിരുന്ന താരം പറഞ്ഞതിങ്ങനെ; “കല്യാണത്തിന് ശേഷം അച്ഛനും അമ്മയെയും വിട്ട് ദൂരെ എവിടെയെങ്കിലും പോയി താമസിക്കേണ്ടി വരുമെന്ന് കരുതിയാണ് ആദ്യം കല്യാണം വേണ്ടെന്ന് വെച്ചത്. പിന്നീട്, അച്ഛന്റെ മരണശേഷം കല്യാണത്തിനെ പറ്റിയുള്ള ചിന്ത തന്നെ മാഞ്ഞു പോയി.” ഒറ്റയ്ക്കുള്ള ഈ ജീവിതത്തിൽ താൻ സന്തുഷ്ടയാണെന്നും, ജോലി തിരക്കുകൾ കാരണം ഒറ്റയ്ക്കാണെന്ന തോന്നൽ തന്നെ അലട്ടിയിരുന്നില്ലെന്നും താരം പറഞ്ഞു.
മൂന്ന് പതിറ്റാണ്ടിലേറെക്കാലം സിനിമയിൽ സജീവമായിരുന്ന താരം നൂറിലധികം ചിത്രങ്ങളിൽ അഭിനയിച്ചിട്ടുണ്ട്. നടി ബിഗ് സ്‌ക്രീനിൽ മാത്രമല്ല ടെലിവിഷൻ രംഗത്തും ചുവടുറപ്പിച്ചു. 2015 ൽ പുറത്തിറങ്ങിയ ‘സൈഗാൾ പാടുകയാണ്’ എന്ന ചിത്രത്തിന് ശേഷം താരം മലയാള സിനിമ രംഗത്ത് നിന്നും ഇടവേള എടുത്തു. എന്നാൽ, തമിഴ്, തെലുങ്ക് ഭാഷകളിൽ നടി ഇപ്പോഴും സജീവമായി തുടരുന്നു.
