Allu Arjun: ‘വിവരം അറിഞ്ഞപ്പോൾ അത് മനസിലാക്കാൻ മണിക്കൂറുകൾ വേണ്ടി വന്നു, മാനസികമായി തകർന്നു, മാപ്പപേക്ഷിക്കുന്നു’; രേവതിയുടെ മരണത്തിൽ അല്ലു അർജുൻ
Allu Arjun Response on Sandhya Theatre Stampede Incident: വിവരം അറിഞ്ഞപ്പോൾ മാനസികമായി തളർന്നു പോയെന്നും, അതിനാലാണ് ഇതുവരെ പ്രതികരിക്കാതിരുന്നതെന്നും അല്ലു അർജുൻ വ്യക്തമാക്കി.
നടൻ അല്ലു അർജുൻ (Image Credits: Facebook)
ഹൈദരാബാദ്: പുഷ്പ 2 ചിത്രത്തിന്റെ പ്രീമിയർ ഷോയ്ക്കിടെ തിക്കിലും തിരക്കിലും പെട്ട് യുവതി മരിച്ച സംഭവത്തിൽ മാപ്പപേക്ഷിച്ച് നടൻ അല്ലു അർജുൻ. വിവരം അറിഞ്ഞപ്പോൾ മാനസികമായി തളർന്നു പോയെന്നും, അതിനാലാണ് ഇതുവരെ പ്രതികരിക്കാതിരുന്നതെന്നും നടൻ വ്യക്തമാക്കി. സന്ധ്യാ തീയറ്ററിൽ ഉണ്ടായ സംഭവം വളരെ ദൗർഭാഗ്യകരമാണെന്നും, അതിന്റെ ഞെട്ടലിൽ നിന്ന് ഇതുവരെ മുക്തി നേടിയിട്ടില്ലെന്നും അദ്ദേഹം പറഞ്ഞു. അല്ലു അർജുൻ ഔദ്യോഗിക എക്സ് അക്കൗണ്ട് വഴിയാണ് സംഭവത്തിൽ ക്ഷമ ചോദിച്ചുകൊണ്ടുള്ള വീഡിയോ പങ്കുവെച്ചത്.
“എന്താണ് സംഭവിച്ചതെന്ന് ഞങ്ങൾക്ക് മനസ്സിലായില്ല. കഴിഞ്ഞ 20 വർഷമായി പ്രീമിയർ ഷോയ്ക്ക് വേണ്ടി തീയറ്ററുകളിൽ പോകുന്നത് ഞാൻ തുടരുന്ന ഒരു കാര്യമാണ്. സന്ധ്യാ തീയറ്ററിൽ നടന്നത് വളരെ ദൗർഭാഗ്യകരമായ സംഭവമാണ്. അന്ന് സിനിമയുടെ പാതിവഴിക്ക് ഞാൻ തീയറ്ററിൽ നിന്ന് ഇറങ്ങിപോകില്ലായിരുന്നു. പക്ഷെ വലിയ തിക്കും തിരക്കും അനുഭവപ്പെടുമെന്ന് തീയറ്റർ മാനേജ്‌മന്റ് പറഞ്ഞത് പ്രകാരമാണ് ഞാൻ പകുതി വഴിക്ക് പുറത്തിറങ്ങിയത്. അടുത്ത ദിവസം മാത്രമാണ് സംഭവിച്ചത് എന്താണെന്ന് അറിയാൻ കഴിഞ്ഞത്. വിവരം അറിഞ്ഞപ്പോൾ അത് എന്താണെന്ന് മനസിലാക്കാൻ തന്നെ മണിക്കൂറുകൾ വേണ്ടി വന്നു. മാനസികമായി ആകെ തളർന്നു. എല്ലാവരും ബ്ലാങ്ക് ആയിപ്പോയി. സംവിധായകൻ സുകുമാർ വളരെ വികാരാധീനനായി. ഞങ്ങളുടെ എല്ലാ ഊർജവും നഷ്ടപ്പെട്ടു. പൂർണമായും തകർന്ന അവസ്ഥയിലായതിനാലാണ് പ്രതികരിക്കാൻ പോലും കഴിയാതിരുന്നത്” അല്ലു അർജുൻ പറഞ്ഞു.
സംവിധായകൻ സുകുമാറും സംഭവത്തിൽ പ്രതികരിച്ചു. താൻ ആറ് വർഷമായി ഈ സിനിമയ്ക്ക് വേണ്ടി പ്രവർത്തിക്കുകയാണെന്നും, എന്നാൽ കഴിഞ്ഞ മൂന്ന് ദിവസമായി താൻ ഒട്ടും സന്തോഷത്തിൽ അല്ലെന്നും അദ്ദേഹം പറഞ്ഞു. ഞെട്ടിക്കുന്ന വാർത്ത കേട്ടപ്പോൾ ഹൃദയം തകർന്നുപോയി. അവരുടെ കുടുംബത്തോട് ഞങ്ങൾ മാപ്പ് ചോദിക്കുന്നു. നിങ്ങൾക്കൊപ്പം ഞങ്ങൾ ഉണ്ടാകുമെന്ന് വാക്ക് തരുന്നുവെന്നും സുകുമാർ പ്രതികരിച്ചു.
കഴിഞ്ഞ ബുധനാഴ്ചയാണ് ഹെെദരാബാദിലെ സന്ധ്യ തീയറ്ററിൽ പ്രിമീയർ ഷോയ്ക്കിടെ ഉണ്ടായ തിക്കിലും തിരക്കിലും പെട്ട് രേവതി എന്ന യുവതി മരണപ്പെട്ടത്. പ്രീമിയർ ഷോ കാണാനായി അല്ലു അർജുനും സംഗീത സംവിധായകൻ ദേവി ശ്രീ പ്രസാദും എത്തിയതിനെ തുടർന്നാണ് ഉന്തും തള്ളും ആരംഭിച്ചത്. അതിനിടയിൽ പെട്ടാണ് യുവതിക്ക് ജീവൻ നഷ്ടമായത്. രേവതിയുടെ ഒൻപത് വയസുകാരനായ മകൻ തേജ് ഗുരുതരാവസ്ഥയിൽ ആശുപത്രിയിൽ ചികിത്സയിലാണ്. അതേസമയം, മരിച്ച രേവതിയുടെ കുടുംബത്തിന് 25 ലക്ഷം രൂപ സഹായധനം നൽകുമെന്നും അല്ലു അർജുൻ അറിയിച്ചു.