‘ജയൻ മാപ്പ് പറയില്ല, മുരളി ഗോപിയുടെ ഈദ് ആശംസയ്ക്ക് കമൻ്റുകളുടെ പ്രവാഹം

മാർച്ച് 27ന് തീയറ്ററിൽ ഇറങ്ങിയ മോഹൻലാൽ-പൃഥ്വിരാജ് ചിത്രം എമ്പുരാനുമായി ബന്ധപ്പെട്ട് വലിയ തരത്തിലുള്ള വിവാദങ്ങളാണ് അരങ്ങേറുന്നത്. ഗുജറാത്ത് കലാപവുമായി ബന്ധപ്പെട്ട ചിത്രത്തിലെ ചില പരാമര്‍ശങ്ങള്‍ ചൂണ്ടികാട്ടിയായിരുന്നു വിവാദങ്ങൾ അരങ്ങേറിയത്. ഇതിനു പിന്നാലെ ഖേദ പ്രകടനവുമായി മോഹൻലാൽ ഫേയ്സ്ബുക്കിൽ പോസ്റ്റ് പങ്കുവച്ചിരുന്നു. പ്രിയപ്പെട്ടവര്‍ക്ക് ഉണ്ടായ മനോവിഷമത്തില്‍ തനിക്കും എമ്പുരാന്‍ ടീമിനും ആത്മാര്‍ത്ഥമായ ഖേദമുണ്ടെന്ന് പറഞ്ഞുകൊണ്ടായിരുന്നു പോസ്റ്റ്.ഇതിനു പിന്നാലെ പൃഥ്വിരാജും ആന്റണി പെരുമ്പാവൂരുമടക്കം സിനിമയുടെ ഭാഗമായവരെല്ലാം പോസ്റ്റ് ഷെയര്‍ ചെയ്തിരുന്നു. എന്നാൽ ഇതിനിടെയിൽ തിരക്കഥാകൃത്ത് മുരളി ​ഗോപിയുടെ മൗനം വലിയ രീതിയിൽ ചർച്ചയാകുകയാണ്.

മുരളി ​ഗോപി പോസ്റ്റ് പങ്കുവെക്കുകയോ പ്രതികരണം നടത്തുകയോ ചെയ്തിരുന്നില്ല. ഇതിനിടെയിൽ ചിത്രത്തിന്റെ ചില ഭാ​ഗങ്ങൾ വെട്ടിമാറ്റി. ഇതിൽ മുരളി ​ഗോപിക്ക് എതിർപ്പുണ്ടെന്ന തരത്തിലുള്ള റിപ്പോർട്ടുകളും പുറത്തുവന്നിരുന്നു. എന്നാൽ താരത്തിന്റെ നിലപാടിനെ പിന്തുണച്ച് നിരവധി പേരാണ് എത്തുന്നത്. ഈദ് ആശംസകൾ നേർന്നുള്ള ഫെയ്സ്ബുക്ക് പോസ്റ്റിന് താഴെയായിരുന്നു ആളുകളുടെ കമന്റ്. ‘ചങ്കൂറ്റം പണയം വെക്കാത്തവൻ’, ‘മാപ്പ് ജയൻ പറയില്ല’,വെറും സിനിമയിൽ മാത്രം അല്ലാത്ത ഒറിജിനൽ ഹീറോ, ‘ഈദ് മുബാറക് പണയം വെക്കാത്ത നിലപാടിന്’, ‘വെറുപ്പിന്റെ ആശയത്തെ സിനിമയിലും സിനിമയിലൂടെ പുറത്തും ലോകത്തിന് കാട്ടിയ ധീരതയ്ക്ക് നന്ദി’, ‘നട്ടെല്ല് വളച്ചു ജീവിക്കുന്നതിലും നല്ലത് പോരാടി മരിക്കുന്നതാണ്’ തുടങ്ങി പോസ്റ്റിന് നിരവധി കമന്റുകളാണ് ലഭിക്കുന്നത്.

Also Read:‘സുപ്രിയ മേനോന്‍ അർബൻ നക്സല്‍, മരുമകളെ നിലയ്ക്ക് നിര്‍ത്തണം’: ബിജെപി നേതാവ് ബി ഗോപാകൃഷ്ണന്‍

അതേസമയം എമ്പുരാൻ്റെ റീ എഡിറ്റഡ് പതിപ്പ് ഇന്ന് മുതൽ തീയറ്ററുകളിൽ എത്തും. വൈകിട്ടോടെയായിരിക്കും റീ എഡിറ്റ് ചെയ്ത ചിത്രത്തിന്‍റെ പ്രദര്‍ശനം. ഗര്‍ഭിണിയെ ബലാത്സംഗം ചെയ്യുന്ന രംഗമടക്കം മൂന്ന് മിനിറ്റ് വെട്ടിമാറ്റിയാണ് ചിത്രമെത്തുന്നത്. ചിത്രത്തിലെ വില്ലൻ കഥാപാത്രമായ ബജ്റംഗിയുടെ പേര് ബൽരാജ് എന്ന് തിരുത്തിയേക്കും.