Kanguva : സമ്മിശ്ര പ്രതികരണങ്ങളിൽ പതറാതെ കങ്കുവ; ബോക്സോഫീസിൽ ആദ്യ ദിനം ഗംഭീര കളക്ഷൻ
Kanguva First Day Box Office Collection : സൂര്യയുടെ ഏറ്റവും പുതിയ ചിത്രമായ കങ്കുവ കഴിഞ്ഞ ദിവസമാണ് തീയറ്ററുകളിലെത്തിയത്. സിനിമയ്ക്ക് ലഭിച്ച സമ്മിശ്ര പ്രതികരണങ്ങൾ ബോക്സോഫീസിൽ ബാധിച്ചില്ലെന്നാണ് കളക്ഷൻ കണക്കുകൾ സൂചിപ്പിക്കുന്നത്.
കങ്കുവ (Image Courtesy - Social Media)
സമ്മിശ്രപ്രതികരണങ്ങൾക്കിടയിലും സൂര്യ നായകനായെത്തിയ സിനിമ ‘കങ്കുവ’യ്ക്ക് ബോക്സോഫീസിൽ ആദ്യ ദിനം ഗംഭീര കളക്ഷൻ. തമിഴ്നാട്ടിൽ ആദ്യ ദിനം 18.37 കോടി നേടിയ ചിത്രം ആദ്യം ഏറ്റവുമധികം കളക്ഷൻ ലഭിക്കുന്ന മൂന്നാമത്തെ ചിത്രമായി മാറി. വിജയ് നായകനായി പുറത്തിറങ്ങിയ ‘ഗോട്ട്’ ആണ് പട്ടികയിൽ മുന്നിൽ. 31 കോടി രൂപയാണ് ‘ഗോട്ട്’ ആദ്യ ദിനം തീയറ്ററിൽ നിന്ന് നേടിയത്. 19 കോടി നേടിയ, രജനികാന്ത് നായകനായ വേട്ടയ്യൻ രണ്ടാമതാണ്.
കേരളത്തിൽ നിന്ന് സിനിമ ആദ്യ ദിനം നാല് കോടി രൂപ നേടി. അഡ്വാൻസ് ഓൺലൈൻ ബുക്കിംഗും ഫാൻസ് ഷോയും ഉൾപ്പെടെയുള്ള കണക്കാണിത്. മമ്മൂട്ടി നായകനായി പുറത്തിറങ്ങിയ ടർബോ ആണ് ഈ വർഷം ആദ്യ ദിവസം കേരള ബോക്സോഫീസിൽ നിന്ന് ഏറ്റവുമധികം കളക്ഷൻ നേടിയ ചിത്രം. ഇത് തകർക്കാൻ കങ്കുവയ്ക്ക് സാധിച്ചില്ല. ഹിന്ദിയിൽ നിന്ന് രണ്ട് കോടി രൂപ കളക്റ്റ് ചെയ്ത ചിത്രം ഓൾ ഇന്ത്യയിൽ 26 കോടി രൂപ ആദ്യ ദിനം നേടി. ആഗോള കളക്ഷൻ 48 കോടി രൂപയാണ്. 350 കോടി രൂപയാണ് സിനിമയുടെ ബജറ്റ്. ലോകത്തൊട്ടാതെ ആറായിരത്തോളം തീയറ്ററുകളിലാണ് സിനിമ റിലീസ് ചെയ്തത്. പ്രീസെയിൽ ബിസിനസിലൂടെ കങ്കുവ 178 കോടി രൂപ നേടിയിരുന്നു. 70 കോടി രൂപയ്ക്കാണ് തമിഴ്നാട്ടിലെ വിതരണാവകാശം വിറ്റുപോയത്. തെലങ്കാന (24 കോടി), കർണാടക, കേരളം (10) കോടി രൂപ വീതം, ഓവർസീസ് (40 കോടി), ഇന്ത്യയിലെ മറ്റിടങ്ങളിൽ ആകെ 24 കോടി എന്നിങ്ങനെയാണ് സിനിമ നേടിയത്.
Also Read : Navya Nair: ‘വെയ്റ്റിങ് ഫോർ നേവൽ ഫോട്ടോഷൂട്ട്’; നവ്യയുടെ പുതിയ ലുക്കിന് വിമർശനം
2021ൽ പുറത്തിറങ്ങി ശ്രദ്ധിക്കപ്പെട്ട ജയ് ഭീമിന് ശേഷം പുറത്തിറങ്ങിയ സിനിമയാണ് കങ്കുവ. 2022ൽ ലോകേഷ് കനഗരാജിൻ്റെ കമൽ ഹാസൻ ചിത്രം റോളക്സിൽ കാമിയോ റോളിൽ താരം അഭിനയിച്ചിരുന്നു. ഏറെ പ്രതീക്ഷയോടെ പുറത്തിറങ്ങിയ സിനിമയാണ് കങ്കുവ. സിനിമയുടെ റിലീസിനോടനുബന്ധിച്ച് നടന്ന ചർച്ചകളും ട്രെയിലറുമൊക്കെ സിനിമയിൽ വലിയ പ്രതീക്ഷ നൽകിയിരുന്നു. കാർത്തിക് സുബ്ബരാജ് അണിയിച്ചൊരുക്കുന്ന സിനിമയിലാണ് സൂര്യ ഇപ്പോൾ അഭിനയിക്കുന്നത്. പൂജ ഹെഗ്ഡെ ആണ് നായിക.