Besty Movie: പത്തിരിപ്പാട്ടിന് പിന്നാലെ കല്യാണപ്പാട്ടും, ചിത്രം ജനുവരി 24-ന്
Besty Movie Updates: ചിത്രത്തിലെ പാട്ടുകൾ രചിച്ചിരിക്കുന്നത് ഒ. എം. കരുവാരക്കുണ്ടാണ്. അൻവർ അമനാണ് ചിത്രത്തിൻ്റെ സംഗീത സംവിധാനം നിർവഹിച്ചിരിക്കുന്നത്
Shaheen Siddique
അഞ്ചു പാട്ടുകളുമായി പ്രദർശനത്തിനെത്തുകയാണ് ഏറ്റവും പുതിയ ചിത്രം ബെസ്റ്റി.ആദ്യം ഒത്തിരി വിഭവങ്ങളുടെ രുചി നിറച്ച പത്തിരിപ്പാട്ട്. തൊട്ടു പിന്നാലെ കല്യാണത്തിൻ്റെ ചന്തം നിറച്ച മഞ്ചാടിപ്പാട്ട്. രണ്ടു പാട്ടുകൾക്കും സംഗീത പ്രേമികളിൽനിന്ന് ലഭിച്ചത് ഹൃദ്യമായ വരവേൽപ്പ് കൂടിയാണ്. വ്യത്യസ്തവും മനോഹരവുമായ പാട്ടുകളാണ് ചിത്രത്തിൻ്റെ പ്രത്യേകത.
ഷാനു സമദിൻ്റെ സംവിധാനത്തിൽ കെ വി അബ്ദുൾ നാസറാണ് ബെൻസി പ്രൊഡക്ഷൻസിന്റെ ബാനറിൽ ചിത്രം നിർമ്മിച്ചിരിക്കുന്നത്. ചിത്രത്തിലെ പാട്ടുകൾ രചിച്ചിരിക്കുന്നത് ഒ. എം. കരുവാരക്കുണ്ടാണ്. അൻവർ അമനാണ് ചിത്രത്തിൻ്റെ സംഗീത സംവിധാനം നിർവഹിച്ചിരിക്കുന്നത്. കോഴിക്കോട് നടന്ന ഓഡിയോ ലോഞ്ചിലാണ് പത്തിരിപ്പാട്ട് പുറത്തിറക്കിയത്.
ഈ പാട്ട് പാടിയിരിക്കുന്നത് ഷഹജ മലപ്പുറമാണ്. സൂപ്പർസ്റ്റാർ മോഹൻലാലാണ് മഞ്ചാടിക്കടവിലെ കല്യാണ കുരുവിക്ക് മിന്നാര കസവൊത്ത നാണം… എന്ന് തുടങ്ങുന്ന കല്യാണ പാട്ട് സമൂഹ മാധ്യമ പേജിലൂടെ റിലീസ് ചെയ്തത്. ഈ പാട്ട് പാടിയിരിക്കുന്നത് അഫ്സലും സിയ ഉൽ ഹഖും ഫാരിഷ ഹുസൈനും ചേർന്നാണ്. അൻവർ അമൻ ആണ് ജലീൽ കെ ബാവയുടെ വരികൾക്ക് ഈണം നൽകിയിരിക്കുന്നത്.
ബെസ്റ്റിയിലെ മറ്റൊരു മനോഹര ഗാനം കൂടി അടുത്ത ദിവസം പുറത്തിറങ്ങുന്നുണ്ട്. മലയാളത്തിലെ എക്കാലത്തെയും സൂപ്പർ ഹിറ്റ് കൂട്ടുകെട്ടായ ഔസേപ്പച്ചനും ഷിബു ചക്രവർത്തിയും വീണ്ടുമൊന്നിക്കുന്ന ഗാനം കൂടിയാണിത്.
ബെസ്റ്റിയിൽ പ്രധാന വേഷങ്ങളിലെത്തുന്നത് ഷഹീൻ സിദ്ദിഖ്, അഷ്കർ സൗദാൻ, സുരേഷ് കൃഷ്ണ, ശ്രവണ, സാക്ഷി അഗർവാൾ, അബു സലിം, ഹരീഷ് കണാരൻ, നിർമ്മൽ പാലാഴി, സുധീർ കരമന, ജോയ് മാത്യു, ജാഫർ ഇടുക്കി, ഗോകുലൻ, സാദിക്ക്, ഉണ്ണിരാജ, നസീർ സംക്രാന്തി, അപ്പുണ്ണി ശശി, സോനനായർ, മെറിന മൈക്കിൾ, അംബിക മോഹൻ, ശ്രീയ ശ്രീ, ക്രിസ്റ്റി ബിന്നെറ്റ് എന്നീ താരങ്ങൾ ചേർന്നാണ്. തെന്നിന്ത്യയിലെ മുൻനിര സാങ്കേതിക പ്രവർത്തകർ ഒന്നിക്കുന്ന ചിത്രത്തിൽ
ജോൺകുട്ടി എഡിറ്റിംഗും ജിജു സണ്ണി ക്യാമറയും എം ആർ രാജാകൃഷ്ണൻ സൗണ്ട് ഡിസൈനിങ്ങും ഫീനിക്സ് പ്രഭു സംഘട്ടനവും നിർവഹിക്കുന്നു. ചിത്രം ജനുവരി 24-ന് തിയേറ്ററിൽ എത്തും.