Akhil Marar: മുഖ്യമന്ത്രിയുടെ ദുരിതാശ്വാസ നിധിക്കെതിരെ പോസ്റ്റ്; അഖില്‍ മാരാർക്കെതിരെ കേസ്

മുഖ്യമന്ത്രിയുടെ ദുരിതാശ്വാസ നിധിക്കെതിരെ ഫേസ്ബുക്കിലൂടെ പ്രചാരണം നടത്തിയതിനു സംവിധായകൻ അഖിൽ മാരാർക്കെതിരെ കേസ്. ഇൻഫോപാർക് പൊലീസാണ് കേസ് എടുത്തത്. മുഖ്യമന്ത്രിയുടെ ദുരിതാശ്വാസ നിധിയിലേക്ക് താൻ പണം നൽകില്ലെന്നും, പകരം താൻ വീടുകൾ വെച്ച് നൽകാമെന്നും പറഞ്ഞായിരുന്നു അഖിലിന്റെ ഫേസ്ബുക് പോസ്റ്റ്.

പോലീസ് കേസ് എടുത്തതിനു തൊട്ടു പിന്നാലെ പുതിയ പോസ്റ്റുമായി അഖിൽ മാരാർ വീണ്ടും രംഗത്തെത്തി. ‘വീണ്ടും കേസ്, മഹാരാജാവ് നീണാൾ വാഴട്ടെ’ എന്നാണ് അഖിൽ ഫേസ്ബുക്കിൽ കുറിച്ചത്. ‘വയനാട്ടിലെ ദുരിതബാധിതർക്ക് താൻ നേരിട്ടും അല്ലാതെയും സഹായം എത്തിക്കുമെന്നും എങ്ങനെ സഹായിക്കണം എന്നത് തന്റെ ഇഷ്ടമാണെന്നും’ അഖിൽ മാരാർ പറഞ്ഞു.

‘മുഖ്യമന്ത്രിയുടെ ദുരിതാശ്വാസനിധി സുതാര്യമാണെങ്കിലും അത് ചിലവഴിക്കുന്നത് സംബന്ധിച്ച അധികാരം മുഖ്യമന്ത്രിക്കാണെന്നും, പിണറായി വിജയൻ കേരളത്തെ രക്ഷിച്ച ജനനായകൻ അല്ല ദുരന്തങ്ങളെ മുതലെടുത്ത് സ്വയം രക്ഷപ്പെട്ടവനാണെന്നും’ അഖിൽ മാരാർ ആരോപിച്ചു.

READ MORE: രാഹുല്‍ ഗാന്ധിയുടെ മോർഫ് ചെയ്ത ചിത്രം പങ്കുവെച്ച് കങ്കണ റണാവത്ത്; വിമർശിച്ച് നെറ്റീസൺസ്

വയനാട്ടിലെ ഉരുൾപൊട്ടലിൽ ദുരിതമനുഭവിക്കുന്നവർക്ക് സഹായം അഭ്യർത്ഥിച്ചുകൊണ്ടുള്ള മുഖ്യമന്ത്രിയുടെ ഫേസ്ബുക് പോസ്റ്റിനെതിരെ പ്രചാരണം നടത്തിയതിനു സംസ്ഥാനത്ത് ഇന്നുവരെ 40 കേസുകളാണ് രജിസ്റ്റർ ചെയ്തത്. മുഖ്യമന്ത്രിയുടെ ദുരിതാശ്വാസനിധിക്ക് എതിരെയുള്ള വ്യാജ പ്രചാരണങ്ങൾ നിരീക്ഷിക്കുന്നതിന് സമൂഹമാധ്യമങ്ങളിൽ സൈബർ പോലീസിന്റെ പെട്രോളിംഗ് ശക്തമാണ്. ഇത്തരത്തിൽ പ്രചാരണം നടത്തിയ 279 സമൂഹമാധ്യമ അക്കൗണ്ടുകൾ കണ്ടെത്തുകയും, അവ നീക്കം ചെയ്യുന്നതിന് നിയമപരമായ നോട്ടീസ് അയക്കുകയും ചെയ്തിട്ടുണ്ട് എന്ന് പോലീസ് അറിയിച്ചു.

മലയാള ചലച്ചിത്ര സംവിധായകനാണ് അഖിൽ മാരാർ. ഡോക്ടർ ബിജു സംവിധാനം ചെയ്ത 2013ൽ പുറത്തിറങ്ങിയ ‘പേരറിയാത്തവൻ’ എന്ന ചിത്രത്തിൽ അസിസ്റ്റന്റ് ഡയറക്ടർ ആയാണ് സിനിമയിൽ അരങ്ങേറ്റം കുറിക്കുന്നത്. പിന്നീട് 2021ൽ ‘ഒരു താത്വിക അവലോകനം’ എന്ന ചിത്രം സംവിധാനം ചെയ്തു. ഏഷ്യാനെറ്റിലെ ബിഗ്‌ബോസ് എന്ന റിയാലിറ്റി ഷോയിലൂടെയാണ് അദ്ദേഹം കൂടുതൽ ശ്രദ്ധിക്കപ്പെട്ടത്. ബിഗ്‌ബോസ് സീസൺ 5 ജേതാവാണ് അഖിൽ.