Spices Board Recruitment 2025: ബിരുദമുണ്ടോ? 25,000 രൂപ ശമ്പളത്തോടെ ജോലി; സ്‌പൈസസ് ബോർഡിൽ ഒഴിവുകൾ

സ്‌പൈസസ് ബോർഡ് ഇന്ത്യ ലിമിറ്റഡ് ഓഫീസ് അസിസ്റ്റന്റ് തസ്തികയിലെ ഒഴിവുകളിലേക്ക് അപേക്ഷ ക്ഷണിച്ചു. കൊച്ചി ഓഫീസിലേക്കാണ് നിയമനം. ആകെ മൂന്ന് ഒഴിവുകളാണ് ഉള്ളത്. താത്പര്യമുള്ള ഉദ്യോഗാർത്ഥികൾക്ക് സ്‌പൈസസ് ബോർഡിന്റെ ഔദ്യോഗിക വെബ്‌സൈറ്റ് വഴി ഓൺലൈനായി അപേക്ഷിക്കാം. മെയ് 2 ആണ് അപേക്ഷ സമർപ്പിക്കാനുള്ള അവസാന തീയതി.

അംഗീകൃത സർവകലാശാലയിൽ നിന്ന് ഏതെങ്കിലും വിഷയത്തിൽ ബിരുദമാണ് വിദ്യാഭ്യാസ യോ​ഗ്യത. കൂടാതെ, ഓഫീസ് ജോലിയിൽ മൂന്ന് വർഷത്തെ പ്രവർത്തി പരിചയം വേണം. അപേക്ഷിക്കാൻ ഫീസ് ആവശ്യമില്ല. അപേക്ഷകരുടെ പ്രായം 40 വയസിൽ കവിയരുത്. തിരഞ്ഞെടുക്കപെടുന്നവർക്ക് പ്രതിമാസം 25,000 രൂപ ശമ്പളം ലഭിക്കും. ഒരു വർഷത്തെ കരാർ അടിസ്ഥാനത്തിലാണ് നിയമനം. ആ കാലയളവിലെ പ്രകടനം അനുസരിച്ച് കരാർ നീട്ടാം.

അപേക്ഷ അയച്ചവരിൽ നിന്ന് ഷോർട്ട് ലിസ്റ്റ് ചെയ്യപ്പെടുന്നവർക്കായി എഴുത്ത് പരീക്ഷയോ അഭിമുഖമോ നടത്തുന്നതാണ്. അഭിമുഖം/ പരീക്ഷ പാസാകുന്നവരുടെ ലിസ്റ്റ് വെബ്‌സൈറ്റിൽ പ്രസിദ്ധീകരിക്കും. സ്‌പൈസസ് ബോർഡിന്റെ കൊച്ചി ഹെഡ് ഓഫീസിൽ വെച്ചായിരിക്കും അഭിമുഖം. സമയവും തീയതിയും പിന്നീട് അറിയിക്കുന്നതാണ്.

അതേസമയം, കൺസൽട്ടന്റ് ഫിനാൻസ് തസ്തികയിലും ഒരു ഒഴിവുണ്ട്. കരാർ അടിസ്ഥാനത്തിൽ തന്നെയാണ് നിയമനം. അംഗീകൃത സ്ഥാപനം/ സർവകലാശാലയിൽ നിന്ന് ബികോം, സിഎ, ഐസിഡബ്ല്യുഎ എന്നിവ പാസായവർക്ക് അപേക്ഷിക്കാം. അപേക്ഷ നൽകുന്നവരുടെ പ്രായം 40 വയസിൽ കവിയരുത്. തിരഞ്ഞെടുക്കപെടുന്നവർക്ക് പ്രതിമാസം 50,000 രൂപ ശമ്പളം ലഭിക്കും. കൂടുതൽ വിവരങ്ങൾക്ക് ഔദ്യോഗിക വെബ്‌സൈറ്റായ www.indianspices​.com സന്ദർശിക്കുക.

ALSO READ: പരീക്ഷയില്ല, 56,000 രൂപ പ്രതിമാസ ശമ്പളം; ന്യൂക്ലിയർ പവർ കോർപ്പറേഷനിൽ 400 ഒഴിവുകൾ

എങ്ങനെ അപേക്ഷിക്കാം?

• സ്‌പൈസസ് ബോർഡിന്റെ ഔദ്യോഗിക വെബ്‌സൈറ്റായ www.indianspices​.com സന്ദർശിക്കുക.
• ഹോം പേജിൽ ലഭ്യമായ ‘ഓപ്പർച്യൂണിറ്റിസ്’ (Opportunities) തിരഞ്ഞെടുത്ത് അപേക്ഷിക്കാൻ ആഗ്രഹിക്കുന്ന തസ്തികയുടെ നോട്ടിഫിക്കേഷൻ തിരഞ്ഞെടുക്കുക.
• നോട്ടിഫിക്കേഷനിൽ ഉള്ള ലിങ്കിൽ ക്ലിക്ക് ചെയ്യുക.
• ഇമെയിൽ ഐഡി നൽകി രജിസ്റ്റർ ചെയ്ത ശേഷം അപേക്ഷ ഫോം പൂരിപ്പിക്കുക.
• ഫോം സമർപ്പിച്ച ശേഷം ഭാവി ആവശ്യങ്ങൾക്കായി ഒരു കോപ്പി പ്രിന്റൗട്ട് എടുത്ത് സൂക്ഷിക്കാം.