Kerala Plus One Admission 2024: ഇന്നു മുതൽ പ്ലസ് വൺ അപേക്ഷകൾ നൽകാം, ആദ്യ അലോട്ട്മെൻറ് ജൂണിൽ, അറിയേണ്ടതെല്ലാം

തിരുവനന്തപുരം:  സംസ്ഥാനത്തെ പ്ലസ് വൺ അലോട്ട്മെൻറിനുള്ള അപേക്ഷകൾ ഇന്നു മുതൽ സമർപ്പിക്കാം. hscap.kerala.gov.in വഴിയാണ് അലോട്ട്മെൻറിനുള്ള അപേക്ഷകൾ സമർപ്പിക്കേണ്ടത്. 2024-2025 അധ്യയന വര്ഷത്തേക്കുള്ള പ്ലസ് വൺ പ്രോസ്പെക്ടസ് പൊതുവിദ്യാഭ്യാസ വകുപ്പ് പുറത്തിറക്കിയിട്ടുണ്ട്.

അവസാന തീയ്യതി

മെയ് 16-ന് ആരംഭിക്കുന്ന അപേക്ഷ പ്രക്രിയകൾ മെയ് 25 വൈകുന്നേരം 4 മണിയോടെ പൂർത്തിയാകും.  ഇതിന് ശേഷം ട്രയൽ അലോട്ട്മെൻറ് മെയ് 29-ന് പ്രസിദ്ധീകരിക്കും. ജൂൺ 6-നാണ് ആദ്യ അലോട്ട്മെൻറ് (മെറിറ്റ്).

ആവശ്യമായ രേഖകൾ

എന്താക്കെ രേഖകളാണ് പ്ലസ് വൺ പ്രവേശനത്തിന് ആവശ്യമെന്ന് നോക്കാം. ശ്രദ്ധിക്കേണ്ട കാര്യം നിർദ്ദിഷ്ട സ്കൂളിനെയും പ്രോഗ്രാമിനെയും ആശ്രയിച്ച് കേരള എച്ച് എസ് സി എ പി പ്ലസ് വൺ പ്രവേശനത്തിന് ആവശ്യമായ രേഖകൾ വ്യത്യാസപ്പെടാം,  രേഖകളുടെ പൊതുവായ പട്ടിക ചുവടെ

1. എസ്.എസ്.എൽ.സി (പത്താം ക്ലാസ്) മാർക്ക് ഷീറ്റ്
2.  പാസ്പോർട്ട് സൈസ് ഫോട്ടോ
3. പഠിച്ച സ്കൂളിൽ നിന്നുള്ള ടിസി (ട്രാൻസ്ഫർ സർട്ടിഫിക്കറ്റ്)
4. ജാതി സർട്ടിഫിക്കറ്റ് (ബാധകമെങ്കിൽ)
5. വരുമാന സർട്ടിഫിക്കറ്റ് (ബാധകമെങ്കിൽ)
6. ഭിന്നശേഷിക്കാർക്കുള്ള മെഡിക്കൽ സർട്ടിഫിക്കറ്റ് (1% വൈകല്യവും അതിനു മുകളിലുള്ളവർക്ക്)
7.  ഗ്രേസ് മാർക്കിന് അർഹരായവർക്ക്- എൻസിസി , സ്പോർട്സ് സർട്ടിഫിക്കറ്റുകൾ

അപേക്ഷാ ഫീസ്

ജനറൽ വിഭാഗത്തിന് 25 രൂപയും, പട്ടികജാതി, പട്ടികവർഗ വിഭാഗത്തിലുള്ളവർക്ക് 10 രൂപയുമാണ് അപേക്ഷാ ഫീസ്. ഫീസ് അപേക്ഷകന്റെ വിഭാഗത്തെ ആശ്രയിച്ച് വ്യത്യാസപ്പെടുന്നു:

അപേക്ഷിക്കേണ്ട വിധം

1. hscap.kerala.gov.in ന് ഔദ്യോഗിക വെബ്സൈറ്റ് സന്ദർശിക്കുക
2. ഹോംപേജിൽ, ‘Apply Online-SWS’ ഓപ്ഷനിൽ ക്ലിക്കുചെയ്യുക
3. നിങ്ങളുടെ ജില്ല തിരഞ്ഞെടുക്കുക
4.  സ്ക്രീനിൽ ദൃശ്യമാകുന്ന അപേക്ഷാ ഫോമിൽ രജിസ്ട്രേഷൻ നമ്പർ, പരീക്ഷാ വിശദാംശങ്ങൾ, വ്യക്തിഗത വിവരങ്ങൾ, താമസസ്ഥലം, ഗ്രേസ് മാർക്കുകൾ (അനുബന്ധ രേഖകൾക്കൊപ്പം) തുടങ്ങിയ വിശദാംശങ്ങൾ പൂരിപ്പിക്കുക. അപേക്ഷ സമർപ്പിക്കുക

ആകെ പ്ലസ് വൺ സീറ്റുകൾ

കഴിഞ്ഞ വർഷം വർധിപ്പിച്ചതടക്കം കേരളത്തിൽ ആകെയുള്ള പ്ലസ് വൺ സീറ്റുകൾ 4,23,315 ആണ്.  കഴിഞ്ഞ വർഷം 62775 സീറ്റുകളാണ് വർധിപ്പിച്ചത്. പാലക്കാട്, കോഴിക്കോട്, മലപ്പുറം, വയനാട്, കണ്ണൂർ, കാസർകോട് എന്നിവിടങ്ങളിലെ സർക്കാർ സ്‌കൂളുകളിൽ 30 ശതമാനം സീറ്റ് വർധിപ്പിച്ചിട്ടുണ്ട്.

കൊല്ലം, എറണാകുളം, തൃശൂർ, ആലപ്പുഴയിലെ അമ്പലപ്പുഴ, ചേർത്തല താലൂക്കുകളിൽ സർക്കാർ, എയ്ഡഡ് സ്‌കൂളുകളിൽ 20% സീറ്റ് വർധനയും നടപ്പാക്കിയിട്ടുണ്ട്.

2022-23ൽ 81 പ്ലസ്-വൺ ബാച്ചുകളും (77 പുതിയതും നാലെണ്ണം തെക്കൻ ജില്ലകളിൽ നിന്ന് മാറ്റി) 2023-24ൽ 97 ബാച്ചുകളും സൃഷ്ടിച്ചു. ഈ ബാച്ചുകളെല്ലാം ഈ വർഷവും തുടരും, ഈ ബാച്ചുകളിലെ മൊത്തം സീറ്റുകൾ 11,965 ആയി ഉയർത്തും.

മന്ത്രി പറഞ്ഞത്

സംസ്ഥാനത്ത് ഹയർസെക്കൻഡറിയിൽ 4.33 ലക്ഷം സീറ്റുകളും വൊക്കേഷണൽ ഹയർസെക്കൻഡറി വിഭാഗത്തിൽ 33,030 സീറ്റുകളുമുണ്ടെന്ന് മന്ത്രി വി. ശിവൻകുട്ടി നേരത്തെ പറഞ്ഞിരുന്നു. എസ്എസ്എൽസി പാസായ എല്ലാവർക്കും ആവശ്യമായ സീറ്റുകളുണ്ട്. ഐടിഐകളിലെ 61,429 സീറ്റുകളും പോളിടെക്‌നിക്കിൽ 9,990 സീറ്റുകളും കൂടി കണക്കാക്കിയാൽ പ്ലസ് ടു സീറ്റുകളുടെ എണ്ണം 4.25 ലക്ഷമാകും.