UGC Net 2024: സിഎസ്ഐആർ യുജിസി നെറ്റ് വിജ്ഞാപനം ഉടൻ എത്തും; പുതിയ അപ്‌ഡേറ്റുകൾ ഇങ്ങനെ

ഡിസംബറിൽ നടക്കുന്ന സിഎസ്ഐആർ യുജിസി നെറ്റ് (CSIR UGC Net) പരീക്ഷയുടെ വിജ്ഞാപനം ഉടൻ എത്തും. ശാസ്ത്രീയ വിഷയങ്ങളിൽ അധ്യാപനത്തിനും റിസർച്ച് ഫെലോഷിപ്പിനുമായി നടത്തുന്ന യോഗ്യത പരീക്ഷയാണ് സിഎസ്ഐആർ യുജിസി നെറ്റ്. നാഷണൽ എഡ്യൂക്കേഷൻ ടെസ്റ്റിംഗ് ഏജൻസി (എൻടിഎ) ആണ് ഈ പരീക്ഷ നടത്തുന്നത്.

കൗൺസിൽ ഓഫ് സയന്റിഫിക് ആൻഡ് റിസേർച്ചും യൂണിവേഴ്സിറ്റി ഗ്രാന്റ്സ് കമ്മീഷനും (യുജിസി) ചേർന്ന് നടത്തുന്ന നാഷണൽ എലിജിബിലിറ്റി ടെസ്റ്റ് ആണിത്. എം.എസ്.സി/ 4 വർഷ ബി.എസ്, ബിടെക്, ബിഫാം, എംബിബിഎസ്, ഇന്റഗ്രേറ്റഡ് ബി.എസ്-എംഎസ് അല്ലെങ്കിൽ തുല്യത പരീക്ഷയിൽ കുറഞ്ഞത് 55 ശതമാനം മാർക്കോടെ പാസായവർക്കാണ് സിഎസ്ഐആർ യുജിസി നെറ്റ് പരീക്ഷയ്ക്ക് അപേക്ഷിക്കാൻ കഴിയുക. സംവരണ വിഭാഗക്കാർക്ക് നിയമാനുസൃത ഇളവുകൾ ലഭിക്കും.

ജെആർഎഫിന് അപേക്ഷിക്കാനുള്ള ഉയർന്ന പ്രായപരിധി 28 വയസാണ്. ഇതിൽ എസ്.സി/ എസ്.ടി വിഭാഗക്കാർ, ഭിന്നശേഷിക്കാർ, വനിതകൾ എന്നിവർക്ക് 33 വയസ് വരെയാകാം. പിന്നാക്ക വിഭാഗക്കാർക്കും 31 വയസ് വരെ അപേക്ഷിക്കാം. അധ്യാപക ജോലിക്കായി അപേക്ഷിക്കുന്നവർക്ക് പ്രായപരിധിയില്ല.

ALSO READ: നാല് വർഷ ബിരുദം ഉള്ളവർക്ക് യുജിസി നെറ്റ് പരീക്ഷയ്ക്ക് അപേക്ഷിക്കാനാകുമോ? അറിയേണ്ടതെല്ലാം

കെമിക്കൽ സയൻസ്, മാത്തമറ്റിക്കൽ സയൻസ്, ഫിസിക്കൽ സയൻസ്, എർത്ത് സയൻസ്, ലൈഫ് സയൻസ് എന്നീ വിഷയങ്ങളിലാണ് സിഎസ്ഐആർ യുജിസി നെറ്റ് പരീക്ഷ നടത്തുന്നത്. അപേക്ഷ സംബന്ധിച്ചുള്ള അപ്‌ഡേറ്റുകൾക്ക് എൻടിയുടെ ഔദ്യോഗിക വെബ്‌സൈറ്റായ https://www.nta.ac.in/ പിന്തുടരുക. അപേക്ഷ, പരീക്ഷ തീയതികൾ, പാറ്റേൺ തുടങ്ങിയ വിവരങ്ങൾ വൈകാതെ എൻടിഎ പുറത്തുവിടും. 1,150 രൂപയാണ് പരീക്ഷക്ക് അപേക്ഷിക്കുന്നതിന് ഫീസ് ഈടാക്കുന്നത്. സംവരണ വിഭാഗക്കാർക്ക് നിയമാനുസൃത ഇളവുകൾ ലഭിക്കുന്നതാണ്.

അതേസമയം, മാനവിക വിഷയങ്ങളിൽ യോഗ്യത നേടിയവർക്കുള്ള പരീക്ഷയായ യുജിസി നെറ്റിനുള്ള അപേക്ഷ നേരത്തെ എൻടിഎ ക്ഷണിച്ചിരുന്നു. ഡിസംബർ 10 വരെയാണ് അപേക്ഷ സമർപ്പിക്കാനാവുക. നിശ്ചിത വിഷയങ്ങളിൽ ജെആർഎഫ് (ജൂനിയർ റിസർച്ച് ഫെലോഷിപ്) ലഭിക്കാനും, അസിസ്റ്റന്റ് പ്രൊഫസർ നിയമനം ലഭിക്കാനും, പിഎച്ച്ഡി പ്രവേശനത്തിന് അപേക്ഷിക്കാനുള്ള അർഹതാ നിർണയ പരീക്ഷയും കൂടിയാണ് യുജിസി നെറ്റ്.

ഔദ്യോഗിക വെബസൈറ്റായ https://www.nta.ac.in/ വഴി വേണം ഉദ്യോഗാർത്ഥികൾ അപേക്ഷ സമർപ്പിക്കാൻ. ഒരു വ്യക്തിക്ക് ഒരു പ്രാവശ്യം മാത്രമേ അപേക്ഷ സമർപ്പിക്കാൻ കഴിയൂ. നിങ്ങളുടെ ഇമെയിൽ ഐഡിയിലേക്കും, മൊബൈൽ നമ്പറിലേക്കുമാണ് എൻടിഎയുടെ തുടർന്നുള്ള അറിയിപ്പുകൾ വരിക എന്നതിനാൽ രജിസ്‌ട്രേഷൻ ചെയ്യുമ്പോൾ അവ കൃത്യമായി നൽകിയിട്ടുണ്ടെന്ന് ഉറപ്പുവരുത്തണം.