Health Insurance: ആരോഗ്യ ഇൻഷുറൻസ് ക്ലെയിം നിരസിച്ചേക്കാം; ഈ തെറ്റുകൾ ചെയ്യല്ലേ…
Health Insurance Claim: വിവിധ കാരണങ്ങളാൽ ഇൻഷുറൻസ് കമ്പനികൾ ക്ലെയിം നിരസിക്കാറുണ്ട്. പേപ്പർ വർക്കുകൾ കൃത്യമായി സമർപ്പിക്കാതിരിക്കുന്നതും രേഖകൾ നഷ്ടപ്പെടുന്നതും ക്ലെയിം നഷ്ടപ്പെടുത്തുന്നു. ക്ലെയിം സമർപ്പിക്കേണ്ട സമയപരിധിയെക്കുറിച്ചും ബോധ്യമുണ്ടായിരിക്കേണ്ടതാണ്.
അപ്രതീക്ഷിതമായ മെഡിക്കൽ സാഹചര്യങ്ങളിൽ നിന്ന് പരിരക്ഷ നൽകുന്നവയാണ് മെഡിക്കൽ ക്ലെയിമുകൾ. എന്നാൽ മെഡിക്കൽ ക്ലെയിമുകൾ നിരസിക്കപ്പെട്ടാലോ? അതെ, വിവിധ കാരണങ്ങളാൽ ഇൻഷുറൻസ് കമ്പനികൾ ക്ലെയിം നിരസിക്കാറുണ്ട്. അവ എന്തൊക്കെയാണെന്ന് പരിശോധിക്കാം.
നടപടിക്രമങ്ങളിലെ തെറ്റുകൾ
ആരോഗ്യ ഇൻഷുറൻസ് ക്ലെയിം ഫയൽ ചെയ്യുമ്പോഴുള്ള നടപടിക്രമങ്ങൾ ശരിയായി ചെയ്യാൻ ശ്രദ്ധിക്കേണ്ടതാണ്. ക്ലെയിമിന് ആവശ്യമായ എല്ലാ ഫോമുകളും തെറ്റ് കൂടാതെ പൂരിപ്പിച്ചിട്ടുണ്ടെന്ന് ഉറപ്പാക്കേണ്ടതാണ്. തെറ്റായ വിവരങ്ങൾ നൽകുന്നതും വിട്ട് പോകുന്നതും ക്ലെയിം നിരസിക്കപ്പെടാൻ കാരണമാകാം. കൂടാതെ എല്ലാ ഡോക്യുമെന്റുകളും കൃത്യമായി സമർപ്പിച്ചിട്ടുണ്ടെന്നും ഉറപ്പു വരുത്തേണ്ടതാണ്. പേപ്പർ വർക്കുകൾ കൃത്യമായി സമർപ്പിക്കാതിരിക്കുന്നതും രേഖകൾ നഷ്ടപ്പെടുന്നതും ക്ലെയിം നഷ്ടപ്പെടുത്തുന്നു. ക്ലെയിം സമർപ്പിക്കേണ്ട സമയപരിധിയെക്കുറിച്ചും ബോധ്യമുണ്ടായിരിക്കേണ്ടതാണ്.
ALSO READ: കടം വാങ്ങിക്കാതെ കല്ല്യാണം കഴിക്കാം; അതിനായി നിക്ഷേപം ശരിയായ ദിശയിലാകട്ടെ
വാലിഡിറ്റി പിരീഡും വെയിറ്റിങ് പിരീഡും
ആരോഗ്യ ഇൻഷുറൻസ് പോളിസികൾക്ക് കൃത്യമായ വാലിഡിറ്റി പീരിയഡ് ഉണ്ടായിരിക്കും. കാലാവധി കഴിഞ്ഞാൽ കവറേജ് ലഭിക്കില്ല. അതിനാൽ ഇക്കാരണത്താൽ നിങ്ങളുടെ ക്ലെയിം നിരസിക്കപ്പെടുന്നത് ഒഴിവാക്കാൻ, കൃത്യമായി പോളിസികൾ, ട്രാക്ക് ചെയ്ത് പുതുക്കേണ്ടതാണ്. ചില സാഹചര്യങ്ങളിൽ ആരോഗ്യ ഇൻഷുറൻസ് പോളിസികൾ വെയിറ്റിങ് പീരിയഡ് ഏർപ്പെടുത്താറുണ്ട്. ഇക്കാലയളവിൽ ചില ആനുകൂല്യങ്ങൾ ലഭ്യമാവുകയില്ല. അതിനാൽ പോളിയുമായി ബന്ധപ്പെട്ട വെയിറ്റിങ് പീരിയഡ് കൃത്യമായി മനസ്സിലാക്കുക.
രോഗാവസ്ഥ
പോളിസി നേടുന്നതിന് മുമ്പുള്ള അസുഖങ്ങൾക്ക് കവറേജ് ലഭിക്കാറില്ല. അത്തരമൊരു സാഹചര്യത്തിൽ കമ്പനി നിങ്ങളുടെ ക്ലെയിം നിരസിച്ചേക്കാം. അതിനാൽ പോളിസി വാങ്ങുന്ന സമയത്ത് തന്നെ നിലവിലുള്ള രോഗാവസ്ഥകൾ സത്യസന്ധമായി വെളിപ്പെടുത്തേണ്ടതാണ്.
മറ്റ് കാരണങ്ങൾ
ചില പോളിസികൾ പ്രത്യേക രോഗാവസ്ഥകളെ അല്ലെങ്കിൽ ചികിത്സകളെ കവറേജിൽ നിന്ന് ഒഴിവാക്കിയിട്ടുണ്ടാകും. ലഹരി ഉപയോഗം പോലെയുള്ള കാരണങ്ങളാൽ ബാധിക്കുന്ന രോഗാവസ്ഥകൾക്ക് ക്ലെയിം നിരസിക്കപ്പെടും. കൂടാതെ ജീവിത ശൈലി രോഗങ്ങളുമായി ബന്ധപ്പെട്ട ക്ലെയിമുകളും നിരസിക്കപ്പെടാറുണ്ട്. പോളിസിയുമായി ബന്ധപ്പെട്ട വ്യവസ്ഥകളിൽ ഉൾപ്പെട്ടിട്ടില്ലാത്ത സ്ഥലങ്ങളിലേക്ക് യാത്ര ചെയ്യുകയും, ഇത്തരത്തിൽ ക്ലെയിമുണ്ടാവുകയും ചെയ്താൽ അത് കമ്പനികൾ സ്വീകരിക്കാറില്ല.
