Glen Maxwell: വീരേന്ദർ സെവാ​ഗ് ഏകാധിപതി; ആ സംഭവത്തിന് ശേഷം ഞങ്ങളൊരിക്കലും സംസാരിച്ചിട്ടില്ല: ​ഗ്ലെൻ മാക്സ്വെൽ

ഇന്ത്യൻ ക്രിക്കറ്റ് ഇതിഹാസം വീരേന്ദർ സെവാ​ഗുമായുള്ള ഭിന്നതകളെ കുറിച്ച് തുറന്നുപറഞ്ഞ് ഓസ്ട്രേലിയന്‍ താരം ഗ്ലെന്‍ മാക്സ്‌വെല്‍.
ഐപിഎല്ലില്‍ പഞ്ചാബ് കിംഗ്സിന്‍റെ ടീം മെന്‍ററായിരുന്ന കാലത്ത് സെവാ​ഗും താനുമായുണ്ടായ പ്രശ്നങ്ങളെ കുറിച്ചാണ് മാക്സ്വെൽ തുറന്നുപറഞ്ഞിരിക്കുന്നത്. ഏകാധിപതിയെ പോലെയാണ് സെവാ​ഗ് ടീം മെന്ററായ കാലത്ത് പ്രവർത്തിച്ചിരുന്നതെന്ന് മാക്സ്‌വെല്‍ തന്‍റെ പുസ്തകമായ ‘ഷോമാനി’ല്‍ ആരോപിച്ചു.

“ഏകാധിപതിയെ പോലെയായിരുന്നു സെവാ​ഗ് പെരുമാറിയിരുന്നത്. പ്ലേയിം​ഗ് ഇലവൻ പോലും തീരുമാനിച്ചിരുന്നത് അദ്ദേഹമായിരുന്നു. ഇന്ത്യ ഓസ്ട്രേലിയ ടെസ്റ്റ് പരമ്പരയ്ക്കിടെ പഞ്ചാബ് കിം​ഗ്സിന്റെ നായകസ്ഥാനത്ത് താനായിരിക്കുമെന്ന് സെവാ​ഗ് പറഞ്ഞു. ടീമിനായി ഒരുമിച്ച് പാഡണിഞ്ഞവരാണ് ഞങ്ങൾ. പിന്നാലെ അദ്ദേ​ഹം ടീമിന്റെ മെന്റർഷിപ്പ് ഏറ്റെടുത്തു. ഇന്ത്യ- ഓസീസ് പരമ്പരയ്ക്കിടെ ആ സീസണിൽ പഞ്ചാബ് കിം​ഗ്സിന്റെ പ്രകടനം ഏത് രീതിയിലായിരിക്കണം എന്നുൾപ്പെടെ ചർച്ച ചെയ്തു. ഒരേ രീതിയിൽ ചിന്തിക്കുന്നവരാണ് ഞങ്ങളെന്ന് പരമ്പരയ്ക്കിടെ എനിക്ക് തോന്നി. എന്നാൽ ആ ധാരണ തെറ്റാണെന്ന് തെളിയാൻ അധിക സമയം വേണ്ടിവന്നില്ല”.

താൻ നായകനായ 2017 സീസണിൽ അരുൺ ജെ കുമാറായിരുന്നു പഞ്ചാബിന്റെ മുഖ്യ പരിശീലകൻ. എന്നാൽ കടലാസിൽ മാത്രമായിരുന്നു അദ്ദേഹം പരിശീലകനായി ഉണ്ടായിരുന്നത്. കാര്യങ്ങൾ തീരുമാനിക്കുന്നതും ടീമിനെ നിയന്ത്രിക്കുന്നതും സെവാ​ഗ് തന്നെയായിരുന്നു. താരങ്ങളെ കുറിച്ചും പരിശീലകരെ കുറിച്ചും സ്വകാര്യമായി എന്നോട് ചോദിച്ചു. കൃത്യമായ മറുപടി ഞാൻ നൽകിയിരുന്നില്ല. പരിശീലകരുടെ സമ്മതത്തോടെ അവരെ ഉൾപ്പെടുത്തി ഒരു വാട്സ്ആപ്പ് ​ഗ്രൂപ്പ് തുടങ്ങണമെന്ന ആവശ്യം ഞാൻ മുന്നോട്ട് വച്ചു. എന്നാൽ സെവാ​ഗ് അതിനെ എതിർത്തു. പ്ലേയിം​ഗ് ഇലവനെ തീരുമാനിക്കുന്നത് അദ്ദേഹമാണെന്നും പറഞ്ഞു.

പൂനെ സൂപ്പർ ജയന്റ്സിനെതിരായ സീസണിലെ അവസാന മത്സരത്തിൽ 9 വിക്കറ്റിന് ഞങ്ങൾ പരാജയപ്പെട്ടിരുന്നു. മത്സരശേഷമുള്ള വാർത്തസമ്മേളനത്തിൽ സെവാ​ഗ് എല്ലാ കുറ്റവും എന്റെ തലയിലിട്ടു. ഞാൻ ഉത്തരവാദിത്തം കുറവായിരുന്നു 73 റൺസിന് ഓൾഔട്ടാകാൻ കാരണമെന്ന് പറഞ്ഞു. മത്സര ശേഷം ഹോട്ടലിൽ എത്തുന്നതിന് മുമ്പേ ടീമിന്റെ പ്രധാനപ്പെട്ട വാട്സ്ആപ്പ് ​ഗ്രൂപ്പിൽ നിന്ന് എന്നെ പുറത്താക്കിയിരുന്നു. ചുറ്റും സംഭവിക്കുന്നത് എന്താണെന്ന് പോലും എനിക്ക് മനസിലായില്ല. സെവാ​ഗിന്റെ ആരാധകൻ കൂടിയായ എനിക്ക് ആ വ്യക്തിയോടുള്ള ബഹുമാനവും നഷ്ടമായി. ഇക്കാര്യം ഞാന്‍ അദ്ദേഹത്തെ അറിയിക്കുകയും ചെയ്തു.

എന്നെ പോലുള്ള ഒരു ആരാധകനെ വേണ്ടെന്നായിരുന്നു അദ്ദേഹത്തിന്റെ മറുപടി. അതിന് ശേഷം ഞങ്ങൾ ഇതുവരെയും പരസ്പരം സംസാരിച്ചിട്ടില്ല. പഞ്ചാബിൽ ഇനി എനിക്ക് സ്ഥാനമില്ലെന്ന് എനിക്ക് മനസിലായി. മെന്ററായി സെവാ​ഗിനെ നിലനിർത്തുന്നത് ടീം മാനേജ്മെന്റ് ചെയ്യുന്ന ഏറ്റവും വലിയ തെറ്റാണെന്ന് ചൂണ്ടിക്കാട്ടിയാണ് ടീം വിട്ടത്.

2014 മുതല്‍ പഞ്ചാബ് കിംഗ്സ് താരമായിരുന്ന മാക്സ്‌വെല്‍ 2017-ലാണ് നായക സ്ഥാനത്ത് അരങ്ങേറിയത്. എന്നാൽ 14 പോയിന്‍റുമായി അഞ്ചാം സ്ഥാനത്താണ് ആ സീസണിൽ പഞ്ചാബ് ഫിനിഷ് ചെയ്തത്. 2017-ൽ ടീം വിട്ട മാക്സ്വെൽ 2020-ൽ വീണ്ടും പഞ്ചാബിലേക്കെത്തി. 2021 മുതൽ റോയൽ ചലഞ്ചേഴ്സ് ബെം​ഗളൂരുവിന്റെ താരമാണ് ​ഗ്ലെൻ മാക്സ്വെൽ.