Pudunagaram Pocso Case: 12 വയസ്സുകാരന് പ്രകൃതി വിരുദ്ധ ലൈംഗിക പീഡനം: പ്രതിക്ക് 30 വർഷം കഠിനതടവ്
Pudunagaram Pocso Case Verdict: പ്രോസിക്യൂഷൻ 14 സാക്ഷികളെ വിസ്തരിച്ച് 23 രേഖകൾ സമർപ്പിച്ചു. പിഴത്തുക കൂടാതെ ഇരയ്ക്ക് അധിക ധനസഹായത്തിനും വിധിയായി
പാലക്കാട്: 12 വയസ്സ് മാത്രം പ്രായമുള്ള ആൺകുട്ടിയെ പ്രകൃതിവിരുദ്ധ ലൈംഗിക പീഡനത്തിന് ഇരയാക്കിയ പ്രതിക്ക് 30 വർഷം കഠിനതടവും പിഴയും.പാലക്കാട് പുതുനഗരം സത്രവട്ടാരം സ്വദേശി മുഹമ്മദ് നിജാമിനെയാണ് പാലക്കാട് ഫാസ്റ്റ് ട്രാക്ക് സ്പെഷ്യൽ പോക്സോ കോടതി ശിക്ഷിച്ചത്. 65000/- രൂപ പിഴയും ഇയാൾ അടക്കണം. പിഴ അടക്കാത്ത പക്ഷം ആറു മാസം അധിക കഠിനതടവും അനുഭവിക്കണം. ഫാസ്റ്റ് ട്രാക്ക് സ്പെഷ്യൽ പോക്സോ കോടതി ജഡ്ജി ടി സഞ്ജുവാണ് വിധി പ്രസ്താവിച്ചത്.
2017-ലാണ് കേസിനാസ്പദമായ സംഭവം നടക്കുന്നത്. പുതുനഗരം സ്കൂളിലേക്ക് വന്നിരുന്ന കുട്ടിയെ ക്ഷണവും ഐസ്ക്രീമും വാങ്ങിച്ചുകൊടുത്ത് പ്രലോഭിപ്പിച്ച് കൊണ്ടുപോയി പ്രകൃതിവിരുദ്ധ ലൈംഗിക പീഡനം നടത്തി എന്നാണ് കേസ്. പുതുനഗരം പോലീസ് രജിസ്റ്റർ ചെയ്ത കേസ് അന്നത്തെ ആലത്തൂർ ഡി.വൈ.എസ്.പി മാരായിരുന്ന P ശശികുമാർ, S ഷംസുദ്ദീൻ, VA കൃഷ്ണദാസ് എന്നിവർ അന്വേഷണം നടത്തി കുറ്റപത്രം സമർപ്പിച്ചിരുന്നു.
പ്രോസിക്യൂഷന് വേണ്ടി സ്പെഷ്യൽ പബ്ലിക് പ്രോസിക്കൂട്ടർ സി രമിക ഹാജരായി. പ്രോസിക്യൂഷൻ 14 സാക്ഷികളെ വിസ്തരിച്ച് 23 രേഖകൾ സമർപ്പിച്ചു. പിഴത്തുക കൂടാതെ ഇരയ്ക്ക് അധിക ധനസഹായത്തിനും വിധിയായി.
