Electricity Bill Kerala : കറണ്ട് ബില്ല് കൂടില്ല…പുതിയ നിരക്ക് പ്രഖ്യാപിക്കും വരെ നിലവിലെ നിരക്ക്
Current electricity rates continue in Kerala: ഓഗസ്റ്റ് രണ്ടിനാണ് കെ എസ് ഇ ബി നിലവിലുള്ള വൈദ്യുതി നിരക്ക് പരിഷ്കരിക്കാനുള്ള അപേക്ഷ നൽകിയത്.
പ്രതീകാത്മക ചിത്രം (Image courtesy : fhm/ getty images)
തിരുവനന്തപുരം: സംസ്ഥാനത്തെ വൈദ്യുതി ബിൽ കൂടിയേക്കുമെന്ന ചർച്ചകളും അതിനു വേണ്ടിയുള്ള നടപടികളും പുരോഗമിക്കുന്നതിനിടെ പുതിയ തീരുമാനം പുറത്തു വരുന്നു. കേരളത്തിൽ നിലവിലുള്ള വൈദ്യുതി നിരക്ക് ഒരു മാസം കൂടി നീട്ടിക്കൊണ്ടാണ് വൈദ്യുതി റെഗുലേറ്ററി കമ്മീഷൻ ഉത്തരവിറക്കിയത്. നവംബർ 30 വരെയോ അല്ലെങ്കിൽ പുതിയ നിരക്ക് പ്രഖ്യാപിച്ചുള്ള ഉത്തരവ് വരുന്നതു വരെയോ ആയിരിക്കും നിലവിലെ നിരക്ക് ബാധകമാവുക എന്നാണ് ഉത്തരവിലുള്ളത്.
നിരക്ക് വർധന സംബന്ധിച്ച അപേക്ഷയിൽ തെളിവെടുപ്പ് നടപടിക്രമങ്ങൾ റെഗുലേറ്ററി കമ്മീഷൻ പൂർത്തിയാക്കിയിട്ടുണ്ടെന്നാണ് വിവരം. ഇലക്ട്രിസിറ്റി ആക്ടിലെ സെക്ഷൻ 64 പ്രകാരമാണ് നിരക്ക് പരിഷ്കരണം നടക്കുക. ഇതനുസരിച്ച് അപേക്ഷ ലഭിച്ച് 120 ദിവസത്തിനകം തെളിവെടുപ്പ് പൂർത്തിയാക്കി അന്തിമ തീരുമാനം എടുക്കണം എന്നാണ് ചട്ടം.
ALSO READ – മലപ്പുറത്തെ ചില പ്രദേശങ്ങളിൽ ഭൂമിക്കടിയിൽ നിന്നും ഉഗ്രശബ്ദം; സ്ഥലത്ത് നിന്നും ആളുകളെ ഒഴിപ്പിച്ചു
ഓഗസ്റ്റ് രണ്ടിനാണ് കെ എസ് ഇ ബി നിലവിലുള്ള വൈദ്യുതി നിരക്ക് പരിഷ്കരിക്കാനുള്ള അപേക്ഷ നൽകിയത്. വേനൽക്കാലത്ത് ഉണ്ടാകുന്ന വലിയ തോതിലുള്ള വൈദ്യുതി ഉപയോഗം, ഉയർന്ന വിലയ്ക്ക് സംസ്ഥാനത്തിന് പുറത്തു നിന്ന് വൈദ്യുതി വാങ്ങിയതിന്റെ അധികബാധ്യത എന്നിങ്ങനെയുള്ള ചെലവുകൾ നികത്താനുള്ള നിരക്ക് പരിഷ്കരണമാണ് കെ എസ് ഇ ബി ആവശ്യപ്പെട്ടത്.
കെ എസ് ഇ ബിയുടെ നിർദ്ദേശങ്ങളും പൊതു തെളിവെടുപ്പിൽ ഉയർന്നതും സെപ്റ്റംബർ 18 വരെ ലഭിച്ച രേഖാമൂലമുള്ള വിവിധ അഭിപ്രായങ്ങളും പരിഗണിച്ചാകും താരിഫ് നിർണ്ണയത്തിന്റെ മുഴുവൻ പ്രക്രിയയും പൂർത്തിയാക്കുക. ഇതിന് കുറച്ച് ആഴ്ചകൾ കൂടി എടുക്കുമെന്ന് കമ്മീഷൻ ഉത്തരവിൽ വ്യക്തമാക്കുന്നുണ്ട്.