Land Dispute : നാല് പതിറ്റാണ്ട് നീണ്ട സ്ഥലത്തർക്കം; 17 വയസുകാരൻ്റെ തല വെട്ടി ഒരു സംഘം ആളുകൾ

നാല് പതിറ്റാണ്ട് നീണ്ട സ്ഥലത്തർക്കത്തെ തുടർന്ന് 17 വയസുകാരൻ്റെ തലവെട്ടി ഒരു സംഘം ആളുകൾ. ഉത്തർപ്രദേശിലെ ജോൺപൂരിൽ ബുധനാഴ്ചയാണ് സംഭവം. ഛേദിച്ച തല മടിയിൽ വച്ച് കുട്ടിയുടെ മാതാവ് മണിക്കൂറുകളോളം ഇരുന്നു എന്ന് ഗ്രാമവാസികൾ പറഞ്ഞതായി എൻഡിടിവി റിപ്പോർട്ട് ചെയ്തു. സംഭവത്തിൽ രണ്ട് പേരെ കസ്റ്റഡിയിലെടുത്തു. ഒരാൾ ഒളിവിലാണ്. ഇയാൾക്കായി പോലീസ് തിരച്ചിൽ ഊർജിതമാക്കി.

പോലീസ് പറയുന്നത് പ്രകാരം തലമുറകൾ നീണ്ടുനിൽക്കുന്ന സ്ഥലത്തർക്കത്തെ തുടർന്നാണ് ക്രൂരമായ ആക്രമണമുണ്ടായത്. കബീറുദ്ദീൻ ഗ്രാമത്തിൽ വച്ചായിരുന്നു സംഭവം. സ്ഥലത്തർക്കത്തിൻ്റെ പേരിൽ ബുധനാഴ്ച ഇവിടെ തർക്കമുണ്ടായിരുന്നു. ഈ തർക്കം അക്രമത്തിലേക്ക് നയിച്ചു. അക്രമത്തിനിടെ രാംജീത് യാദവിൻ്റെ 17കാരനായ മകനെ ചിലർ പിന്തുടർന്നു. ഇവരിൽ ഒരാൾ വാളും കൊണ്ടാണ് വന്നത്. സംഘം കുട്ടിയെ പിന്തുടർന്ന് വാൾ വീശി തലയറുക്കുകയായിരുന്നു. സംഭവത്തിൽ രണ്ട് പേർ കസ്റ്റഡിയിലായെങ്കിലും വാൾ വീശിയ ആൾ ഒളിവിലാണ്.

Also Read : Drishyam model crime: ദൃശ്യം പലവട്ടം കണ്ടു… മൃതദേഹം കുഴിച്ചിടുന്ന സീനാണ് പ്രചോദനമായത്… വ്യവസായിയുടെ ഭാര്യയുടെ കൊലപാതകത്തിലെ പ്രതി പറഞ്ഞത് ഇങ്ങനെ…

അക്രമം അറിഞ്ഞയുടൻ പോലീസ് ഉദ്യോഗസ്ഥർ സ്ഥലത്തെത്തി. “ഈ സ്ഥലത്തർക്കം 40- 45 വർഷങ്ങളായി നടക്കുന്നുണ്ട്. ഇതിൽ ഒരു സംഘത്തിലെ രമേഷ്, ലാൽറ്റ എന്നീ രണ്ടുപേർ ഉൾപ്പെടെ ചിലർ ചേർന്ന് ഒരാളെ ആക്രമിച്ച് കൊന്നു. ജില്ലാ മജിസ്ട്രേറ്റും ഞാനും സ്ഥലത്ത് എത്തി. കുറ്റാരോപിതരിൽ ചിലരെ കസ്റ്റഡിയിലെടുത്തു. ഇവരെ ചോദ്യം ചെയ്യുകയാണ്. സംഭവത്തിൽ അന്വേഷണം പുരോഗമിക്കുകയാണ്.”- പോലീസ് സൂപ്രണ്ട് അജയ് പാൽ ശർമ പറഞ്ഞു.