Vinesh Phogat: ജുലാനയിൽ ബിജെപിയെ മലർത്തിയടിച്ച് വിനേഷ് ഫോഗട്ട്; ഗുസ്തി താരം ഇനി എംഎൽഎ
Vinesh Phogat Election Result: ഹരിയാന നിയമസഭാ തെരഞ്ഞെടുപ്പിൽ രാജ്യം ഉറ്റുനോക്കിയ മണ്ഡലമായി ജുലാനയെ മാറ്റിയത് വിനേഷിന്റെ സ്ഥാനാർത്ഥിത്വമാണ്. വിനേഷിലൂടെ 19 വർഷത്തിന് ശേഷം ജുലാന മണ്ഡലം തിരിച്ചുപിടിച്ചിരിക്കുകയാണ് കോൺഗ്രസ്.
Image Credit: PTI
ഹരിയാന: ഗോദയ്ക്കകത്തും പുറത്തും പോരാട്ടത്തിന്റെ ഉറച്ച ശബ്ദമായി മാറിയ ഗുസ്തിതാരം, പേര് വിനേഷ് ഫോഗട്ട്. അയോഗ്യയാക്കിയ പാരിസ് ഒളിമ്പിക്സ് വേദിയിൽ നിന്ന് പരിചയമില്ലാതെ തെരഞ്ഞെടുപ്പ് ഗോദയിലേക്കാണ് വിനേഷ് ഫോഗട്ട് പോരാട്ടത്തിന് ഇറങ്ങിയത്. എതിരാളിയെ മലർത്തിയടിച്ച് തെരഞ്ഞെടുപ്പ് ഗോദയിലും താൻ ഒന്നാമനെന്ന് താരം തെളിയിച്ചു. ഹരിയാനയിലെ ജുലാന മണ്ഡലത്തിലെ ത്രികോണ മത്സരത്തിൽ വിനേഷ് ഫോഗട്ടിന്റെ ജയം 6,140 വോട്ടുകൾക്ക്. ഹരിയാന നിയമസഭാ തെരഞ്ഞെടുപ്പിൽ രാജ്യം ഉറ്റുനോക്കിയ മണ്ഡലമായി ജുലാനയെ മാറ്റിയത് വിനേഷിന്റെ സ്ഥാനാർത്ഥിത്വമാണ്. വിനേഷിലൂടെ 19 വർഷത്തിന് ശേഷം ജുലാന മണ്ഡലം തിരിച്ചുപിടിച്ചിരിക്കുകയാണ് കോൺഗ്രസ്. സ്ഥാനാർത്ഥിത്വം പ്രഖ്യാപിച്ചപ്പോൾ മുതൽവിനേഷ് ഫോഗട്ട് ജയിക്കുമെന്ന ആത്മവിശ്വാസത്തിലായിരുന്നു കോൺഗ്രസ് ക്യാമ്പ്. ആ വിശ്വാസം ജുലാനയിലെ ജനങ്ങൾ കാത്തു.
60,580 വോട്ടുകളാണ് വിനേഷിന്റെ ബാലറ്റ് പെട്ടിയിൽ വീണത്. ബിജെപിയുടെ യോഗേഷ് കുമാർ 59,065 വോട്ടും ഐഎൻഎൽഡിയുടെ സുരേന്ദർ ലാഥർ 10,158 വോട്ടും പോക്കറ്റിലാക്കി. തോൽപ്പിക്കേണ്ടവരുടെ പട്ടികയിൽ ബിജെപി ഒന്നാമതായി മുദ്രകുത്തിയ പേരും ഒരുപക്ഷേ വിനേഷിന്റെതാകാം. ഗോദയിലെ രാഷ്ട്രീയവും കേന്ദ്രസർക്കാരിന്റെ ജനദ്രോഹ നയങ്ങൾക്കുമെതിരെ സംസാരിച്ചവൾ. കന്നി തെരഞ്ഞെടുപ്പ് അങ്കത്തിൽ മലർത്തിയടിച്ചത് സെെനിക ഉദ്യോഗസ്ഥനായിരുന്ന ബിജെപിയുടെ യോഗേഷ് ബൈറഗിയെ. ഗുസ്തിയിലും പവർ ലിഫ്റ്റിങ്ങിലും കരുത്ത് തെളിയിച്ച കവിത ദലാൽ, അമര്‍ജീത് ദണ്ഡ എന്നിവരായിരുന്നു മറ്റ് എതിരാളികൾ. ആദ്യഘട്ടത്തിൽ തന്നെ ലീഡ് നില ഉയർത്തിയെങ്കിലും ഒരു ഘട്ടത്തിൽ പുറകോട്ട് നിന്നതിന് ശേഷമാണ് വിനേഷ് ഫോഗട്ടിന്റെ ത്രില്ലർ ജയം. ഒക്ടോബർ 5-ന് നടന്ന തെരഞ്ഞെടുപ്പിൽ ജുലാനയിൽ 74.66 ശതമാനം പോളിംഗാണ് രേഖപ്പെടുത്തിയത്.
എക്സിറ്റ് പോൾ ഫലങ്ങളെ നാമാവശേഷമാക്കി ഹരിയാനയിൽ താമര വിരിഞ്ഞപ്പോൾ ജുലാന വിനേഷിനൊപ്പം നിന്നു. ഭർത്താവും ഗുസ്തിതാരവുമായ സോംഭീർ റാത്തിയുടെ നാട്ടിലാണ് വിനേഷിന്റെ തെരഞ്ഞെടുപ്പ് ജയം. സ്പോർട്സ് ക്വാട്ട വഴി ലഭിച്ച റെയിൽവേയിലെ ജോലി രാജിവച്ചാണ് രാഷ്ട്രീയ ഗോദയിലേക്ക് പെൺകരുത്ത് മത്സരിക്കാൻ ഇറങ്ങിയത്. ഗുസ്തി താരങ്ങളുടെ സമരവും കർഷക പ്രക്ഷോഭവും പാരിസ് ഒളിമ്പിക്സിൽ നിർഭാഗ്യവശാൽ നഷ്ടമായ സ്വർണവുമെല്ലാം വിനേഷിനെ ജുലാനയിലെ ജനങ്ങളിലേക്ക് അടുപ്പിച്ചു.
ബിജെപിക്ക് വെല്ലുവിളിയായ ഗുസ്തിതാരങ്ങളുടെ സമരത്തെ മുന്നോട്ട് നയിച്ചതും വിനേഷ് ഫോഗട്ടായിരുന്നു. ബിജെപി നേതാവും ഗുസ്തി ഫെഡറേഷന്റെ മുൻ ബ്രിജ്ഭൂഷൺ ചരൺ സിംഗിനെതിരായിരുന്നു ഗുസ്തിതാരങ്ങളുടെ പോരാട്ടം. സമരം ഫലം കണ്ടപ്പോഴും ബിജെപിയുടെ തലവേദനയായി വിനേഷ് മാറി. പാരിസ് ഒളിമ്പിക്സിൽ മെഡൽ നഷ്ടപ്പെട്ടപ്പോഴും ഒരു വിഭാഗം വിനേഷിനെതിതെ തിരിഞ്ഞു. 100 ഗ്രാം ഭാരത്തിന്റെ പേരിൽ അയോഗ്യയായി രാജ്യത്തേക്ക് മടങ്ങിയെത്തിയ വിനേഷിനെ ഇരുകയ്യും നീട്ടിയാണ് ഹരിയാനയും ജനങ്ങളും സ്വീകരിച്ചത്.
പാരിസിൽ നിന്ന് തിരിച്ചെത്തിയതിന് പിന്നാലെ ഗുസ്തിയിൽ നിന്ന് വിനേഷ് ഫോഗട്ട് വിരമിക്കൽ പ്രഖ്യാപിച്ചിരുന്നു. വിരമിക്കൽ പ്രഖ്യാപനത്തിന് ശേഷം രാഹുൽ ഗാന്ധിയിൽ നിന്ന് കോൺഗ്രസ് അംഗത്വം സ്വീകരിച്ചു. പിന്നാലെ പ്രഖ്യാപിച്ച കോൺഗ്രസ് സ്ഥാനാർത്ഥികളുടെ പട്ടികയിൽ രാജ്യം ശ്രദ്ധിച്ചത് വിനേഷ് ഫോഗട്ടിന്റെ പേര്.