BSNL Kerala: നഷ്ടമെല്ലാം പഴങ്കഥ; അടിച്ചുകയറി ബിഎസ്എൻഎൽ, വരുമാനം 1859 കോടി

Image Credits: Getty Images

തിരുവനന്തപുരം: തുടർച്ചയായ 5 വർഷത്തെ സാമ്പത്തിക നഷ്ടത്തിൽ നിന്ന് കരകയറി ബിഎസ്എൻഎൽ. കഴിഞ്ഞ സാമ്പത്തിക വർഷത്തിലെ കേരള സർക്കിളിലെ വരുമാനം 1859.9 കോടിയായി. ഏകദേശം 63 കോടിയോളം രൂപയുടെ ലാഭവും കേരളവും ലക്ഷദ്വീപും ഉൾപ്പെടുന്ന കേരള സർക്കിളിൽ നിന്ന് സ്വന്തമാക്കി. ഈ സാമ്പത്തിക വർഷം സർക്കിൾ വരുമാനം 2200 കോടിയായി ഉയരുമെന്നാണ് അധികൃതർ പ്രതീക്ഷിക്കുന്നത്.

512 കോടിയാണ് ഈ സാമ്പത്തിക വർഷത്തിലെ ആദ്യ പാദത്തിന്റെ വരുമാനം. രാജ്യത്തിന്റെ വിവിധ ഭാ​ഗങ്ങളിലെ 4 ജി വ്യാപനം ഉൾപ്പെടെ അടിസ്ഥാന സൗകര്യ വികസനത്തിനായി 1,656 കോടി രൂപ ചെലവഴിക്കും. കേരളത്തിലെ തിരഞ്ഞെടുക്കപ്പെട്ട പ്രദേശങ്ങളിൽ ഈ വർഷം അവസാനത്തോടെ കേരളത്തിൽ 4ജി ടവറുകൾ സ്ഥാപിക്കുന്നത് പൂർത്തിയാക്കാനാണ് ലക്ഷ്യം വയ്ക്കുന്നത്.

7000 ടവറുകളിൽ 2500 ടവറുകൾ 4ജിയിലേക്ക് അപ്​ഗ്രേഡ് ചെയ്തു. ലക്ഷദ്വീപിലെ 18 ഇടങ്ങളിലാണ് പുതിയ 4 ജി ടവറുകൾ സ്ഥാപിക്കുന്നത്. ചെറിയ സാങ്കേതിക വിദ്യയിലൂടെ വരും കാലത്ത് 5 ജി സേവനം ഉറപ്പുവരുത്താൻ സാധിക്കുന്നതാണ് പുതിയതായി സ്ഥാപിക്കുന്ന 4 ജി ടവറുകൾ. നിലവിൽ 89 ലക്ഷം ആളുകളാണ് കേരളത്തിൽ ബിഎസ്എൻഎൽ സിം ഉപയോ​ഗിക്കുന്നത്.

6.71 ലക്ഷം ആളുകൾ ബിഎസ്എൻഎല്ലിന്റെ ഫെെബർ ടു ദി ഹോം(എഫ്ടിടിഎച്ച്) ഇന്റർനെറ്റ് സൗകര്യവും ഉപയോ​ഗപ്പെടുത്തുന്നുണ്ട്. വ്യവസായ സ്ഥാപനങ്ങൾക്ക് സുരക്ഷിതമായ 5 ജി നെറ്റ്വർക്ക് ഒരുക്കുന്ന 5 ജീ കാപ്റ്റീവ് നോൺ പബ്ലിക് നെറ്റ്വർക്ക് സിഡാക്കിന്റെ സഹായത്തോടെ ലഭ്യമാക്കുന്ന പദ്ധതിയും ബിഎസ്എൻഎൽ ആരംഭിച്ചിട്ടുണ്ട്. വീടുകളിലെ എഫ്ടിടിഎച്ച് അക്കൗണ്ട് ഉപയോ​ഗിച്ച് മറ്റുസ്ഥലങ്ങളിലെ എഫ്ടിടിഎച്ച് ഉപയോ​ഗിക്കാവുന്ന രീതിയും ബിഎസ്എൻഎൽ ഉടൻ പുറത്തിറക്കും. എഫ്ടിടിഎച്ച് കണക്ഷനുകൾ അതിവേ​ഗം 10 ലക്ഷം കടക്കുമെന്നാണ് അധികൃതരുടെ വിലയിരുത്തൽ.

സ്വകാര്യ ടെലികോം സേവന ദാതാക്കളായ എയർടെെൽ, ജിയോ, വിഐ എന്നിവ ജൂണിൽ നിരക്ക് വർദ്ധിപ്പിച്ചിരുന്നു. ഇതോടെയാണ് ബിഎസ്എൻഎൽ വരിക്കാരുടെ എണ്ണത്തിൽ വർദ്ധനയുണ്ടായത്. ഏകദേശം 9 ലക്ഷത്തോളം ഉപഭോക്താക്കളാണ് ബിഎസ്എൻഎൽ സേവനം ഉപയോ​ഗപ്പെടുത്തിയത്. ജൂണിൽ ഏഴ് ലക്ഷത്തോളം ഉപഭോക്താക്കളെ ബിഎസ്എൻഎല്ലിന് നഷ്ടമായിരുന്നു. എന്നാൽ ജൂലെെയിൽ 10 ലക്ഷത്തിലധികം വരിക്കാരെ ബിഎസ്എൻഎൽ തിരികെ കൊണ്ടുവന്നു. യൂസർമാരെ ആകർഷിക്കുന്ന പ്ലാനുകളാണ് ഇതിന് പിന്നിൽ.

കഴിഞ്ഞ ദിവസം യൂസർമാരെ ആകർഷിക്കുന്ന 91 രൂപയുടെ പുതിയ പ്ലാൻ ബിഎസ്എൻഎൽ പുറത്തിറക്കിയിരുന്നു. എന്നാല്‍ ഈ പ്ലാനിനൊപ്പം കോളോ ഡാറ്റയോ സൗജന്യ എസ്എംഎസോ ലഭിക്കില്ല. ഈ പ്ലാന് തിരഞ്ഞെടുക്കുന്നവരുടെ സിം കാർഡ് 90 ദിവസം ആക്ടീവായിരിക്കും എന്നതാണ് പ്രത്യേകത. കോൾ, ഡാറ്റ സേവനങ്ങൾ ആവശ്യമുള്ള ഉപഭോക്താക്കളാണെങ്കിൽ ഈ പ്ലാനിനൊപ്പം മറ്റ് ടോപ്‌അപ്പ്, പ്രത്യേക ഡാറ്റ പാക്കേജുകള്‍ റീച്ചാര്‍ജ് ചെയ്യേണ്ടി വരും.